Dear Tito Miguel ,
Ako diay si Charis Mae , taga Barangay Labangon, Cebu City. Naproblema ko sa akong boyfriend nga si Jan-Jan nga usa ka band vocalist, doulonon kaayo og mga chix . Duna man ko'y salig niya pero naproblema ko kay basin matintal ba. Pila na ka higayon, nga human nila og tukar, malangan siya og uli, kay pasabayon siya og tagay sa mga chix. What if diay, ang chix kay guwapa kaayo , unya maayo kaayo manintal . Tabangi ko Tito Miguel, aron makumbinser ko nga dili ko angayan maghuna-huna og daotan . Daghang salamat.
Charis Mae,
Matintal gyud siya kun cheater siya daan. Ang laki nga ligdong ug kanimo tiunay nga nagmahal, maski bilangkaran dili magpatintal. Pero kun siya mabudhion, dili na kinahanglan motukar siya sa banda ug makigtagay sa mga babaye ini’g ka gabii.
Ang tawo nga sa usa dili makuntento mangita gyud na’g lusot aron makatilaw’g lain. Busa gamita nga sukod sa iyang kaligdong ang iyang sitwasyon. Kun siya mahagba sa panuway, buot pasabot dili pa ka niya hingpit nga gihigugma. Ang tawo nga kanimo nagpangga dili mobuhat sa maski unsa nga makapasakit nimo. Gawas kun wala tuyoa. Apan ang pagbudhi ug panlingla, planado kana. Pero angayan sab nimo siya pahibaw-on sa imong mga gibati ug kahadlok. Kay basin siya magtuo nga wala ka’y pakialam kaniya. Kinahanglan sab siya makahibawo nga hadlok ka mailog siya’g lain, kay basin mao na iyang sukod asa siya dapit sa imong kasingkasing. Istoryaha kausa ra. Ayaw balik -balika. Sigurado mopasalig nga wala siya’y buhaton nga dautan. Paminawa lang. Apan ayaw’g salig sa mga pulong. Ang buhat ang imo angay tan-awon.
Ayaw’g sukit-sukit, ayaw’g imbestigar. Ang kamatuoran motumaw ra’g iyaha, dili ka mistil mangutana. Kun siya makahibawo nga ikaw naniid, motago na’g samot kun duna man siya’y binuhatan. Tagamtama ang inyong relasyon, higugmaa siya og taman sa imong makaya aron iyang makita nga dili ka angay budhian. Kun mahitabo ang imong gikahadlokan, buot pasabot dili siya ang para kanimo. Dili na sab ka magmahay ka’y wala man ka nagkulang, siya ang nasobraan. —Tito Miguel
Magpatambag ka? Ipada kang Tito Miguel: 0991-318-9366