"Kuyog-baboy” ang gf!

Dear Tito Miguel ,

Maayong adlaw kanimo! Ako diay si Reden, taga Mambaling, Cebu City. Ang problema nako kay ang akong girlfriend kuyog-baboy kaayo. Like bisan manglaag mi sa akong barkada nga puro lang boys, ganahan gyud siya mouban. Mao gyud na ang permi namong awayan. Lain man sad kaayo gud nga ako siya paubanon nga puros mi boys. — REDEN

Reden,

Suwayan nato’g tuki ngano. Posible iyang kalibotan ikaw ra, magsunod-sunod maski asa ka. Dili sa tanan higayon kinahanglan mo magkuyog. Dunay kamo duha lang, dunay kuyog sa barkada, pamilya ug panahon para mag-inusara. Personal space ba, aron duna moy hinangpon ug istoryahan inig kita ninyo duha. Kun sige mo’g kuyog, unsa pa man inyo istoryahan nga nakita na man ninyo duha tanan?

Lagmit siya selosa, magduda naay masagol ninyo nga laing babaye. Wala man kaha kay binuhatan sa una. Kun duna, masabtan nga magduda siya. Apan kay gihatagan man ka niya’g laing higayon, kinahanglan mosalig siya. Kun wala kay binuhatan apan iyang hunahuna sige’g mugna, lisod kay dili ka makabuot sa iyang gibati ug gihunahuna. Naa ra nimo kun mopadayon ka sa relasyon nga sige ka’g sagang maski wala ka mosimang. Pula nga bandila. Angay ka magduha duha, kay kun magdayon mo,basin di ka makagawas sa inyo.

Basin sab malingaw lang gyud siya sa imong barkada. Maayo, apan imong barkada nalingaw o kumportable ba kaha nga naa siya? Labi na’g sige lang mo’g sikit ug hinunghongay sa tapok sa barkada, luod. Kinahanglan niya respetaran ang grupo.

Barug, kun for the boys ang lakaw, dili siya mosagol aron dili bakikaw. Dalha lamang siya kun ang tapok kuyog ang uyab o asawa. Ipasalig nga kun duna sad siya’y lakaw sa iyang barkada, modistansiya ka aron hingpit nga malingaw sila. Kun di mopatuo, naa ra nimo’g uyab ra ka niya samtang sa imong barkada dili na higala. —Tito Miguel

Magpatambag ka? Ipada kang Tito Miguel: 0998-581-5856