Dear Tito Miguel,
Ako si Jamilia. Naay nidiskarte nako, siya si Jojo, usa ka architect. Naa koy nadunggan nga istorya sa ubang tawo, nga usa ka maya si Jojo. Ganahan ko mangutana niya ,pero mahadlok man ko uy. Mura'g akward kaayo ang topic. Wala ra may problema nako nga maka-uyab ko og maya. Ganahan lang ko nga mosulti siya daan, kay dili ko ganahan magtago-tago siya. —Jamilia
Jamilia,
Sigurado ka nga ok ra nimo ang maya basta mosulti lang sa tinuod? Basin mangita na’g dili nimo ikahatag. Hinuon, wala may garantiya sa kinabuhi, sugal ang tanan, labi na sa relasyon. Ikaw ra ang bugtong makahukom. Apan imong pangutana unsao’g kumpirma sa imong nadunggan bahin sa iyang pagkatawo. Insakto ka, lisod nga moderetso ka’g pangutana, pribado kini’g sensitibo.
Kay nidiskarte man siya nimo, mahimo ka mangutana pila na iyang uyab kaniadto, unsa kaha’y rason ngano nagkabuwag sila. Paniid sa iyang tinubagan, paminawa ang rason, lagmit naa kay mabingwit. Human niya’g tubag, suwayi’g singit nga karon, gawasnon na ang mga tawo sa ilang sekswalidad, ang kaniadto babaye ug lalaki ra, karon nagkalain-lain na. Pangutan-a unsa iyang tan-aw sa mga lalaki nga mopatol sa lalaki. Tutoki iyang mga mata, paniid kun molingiw ba.
Kun dili siya kumportable sa topic, posible tinuod. Padayon sa hisgot, ipasalig nga gusto lang ka makahibawo sa iyang panan-aw, supak ba kini sa iyang relihiyon o baruganan. Ingna daghan ka’g kaila nga nakasuway na, kanimo walay problema basta wala sila’y giilad nga uyab o asawa. Sa maong paagi mapasidan-an siya.
Sumpayi dayon nga wala kay isyu kun pananglit siya nakasuway na. Gani, ok ra gihapon nimo kun pananglit ganahan siya’g lalaki basta klarohon ka lang. Aron ka makabitik, kinahanglan imong mga mata ug dunggan abtik. Paniid sa iyang body language, labi na sa iyang mga mata, aron duna kay makumpirma nga dili na niya kinahanglan ipamulong pa. Tito Miguel
Magpatambag ka? Ipada kang Tito Miguel: 0998-581-5856