Pasagdi ug biyai

Dear Tito Miguel,

Maayong adlaw Tito Miguel, ako si Cresha, taga  Barangay Guadalupe. Akong problema kay akong boyfriend naadik sa Mobile Legends. Okay ra niya nga mag-away mi, basta malingaw lang siya sa ML.  Niingon rapud siya, if dili daw ko kaagwanta, puwede ra daw mi magbuwag. Ing-ana ang klase sa iyang utok, unsa akong buhaton para matul-id ang iyang panghuna-huna?  —Cresha

Cresha,

Ayaw tul-ira, nag usik-usik ra ka sa imong panahon. Pasagdi ug biyai, kaniya dili ka importante. Laliman ka’g gihagit ka’g biya kun di ka kaagwanta. Buot pasabot mas bug-at niya ang lingaw kay sa ikaw. Wa ka maghisgot sa iyang edad. Apan ang kahamtong wala sa pangidaron. Gawas nga klaro nga wala pa siya’y buot, tataw sab nga kanimo wala siya magmahal. Kay kun tinuod pa ka niya nga gihigugma, iya unta ipalabi imong gibati kay sa iyang lingaw. Mas ganahan unta siya nga kuyog mo kay sa magsige siya’g duwa. Busa pasagdi siya maglingaw ug magtagbaw, apan ayaw paabota nga mausab kay mamuti na imong mga mata pinaabot sa bata nga walay kabuot.

Tinuod, angay siya maglingaw, dili sa tanang higayon nga ikaw ra iyang atimanon, pero kun subra na nga siya mismo dili kapugong kay lagi na-addict na, walay si bisan kinsa makapausab kaniya. Dili ikaw, dili sab iyang pamilya. Tingali gihigugma gyud nimo siya kay gusto man ka nga siya mareporma. Mahimo man unta kun gihigugma sab ka maski badlungon nga way sama. Apan kay ibaylo man ka sa iyang kalingawan, ayaw na’g usba ang iyang naandan. Mao nay kasagaran sipyat, ang usbon ang pagkatawo sa karelasyon. Kun ang batasan dili nimo makaon ug ang pag-usab walay paglaom ug kun di na ka kaagwanta, sunda siya. Itak-om na inyong relasyon. Timan-i, uyab ka, dili rehab.  —Tito Miguel

* * *

Magpatambag ka? Ipada kang Tito Miguel: 0998-581-5856