Ang katam-is sa pahiyom ni Catalina

Gikaibgan si Catalina sa mga ulitawo dinhi sa balangay Bag-ong Subang. Nindot siya’g lawas ug  puti ang pamanit. Sa iyang katahom dunay usa ka lalaki nga naibog kaniya sa  hilom. Kini mao si Fausto. Minyo si Fausto ug masakiton ang asawa. Dili makahatag og kalipay si Magda kaniya sa higayon nga iyang hangyuon bahin sa lawasnong kahinam. Ug misabot na lang si Fausto. Apan gihidlaw na siya’g lawasnong katagbawan. Apan, “Sorry, Fausto, nga dili na ako makahimo,” si Magda mipasabot. Diha sila niadto manglingkod sa pantawan. Ug wala motingog si Fausto nga nakasabot usab sa sitwasyon sa iyang asawa nga masakiton. Dunay leukemia ang iyang asawa.

“Okey lang,” hinay’ng tubag sa bana.

Tuod, usa ka hapon dihang nagkuhag tubig si Fausto sa tubod nga tin-aw nga midahili gikan sa lungag sa pangpang, wala damhang ni nakita Fausto si Catalina nga naligo. Mihulma sa nipis nga sinina niini ang kaanindot sa iyang lawas ug nakapanglad-ok si Fausto. Mipadayon si Catalina sa pagbubo sa tubig sa tubod pinaagi sa kabo niining plastik. Ug iyang nakita si Fausto nga diha na sa may duol kaniya nagbarog kinsa nagbitbit sa iyang balde.

“Fa-Fausto, hala, uy, ganina ra ka diha, no,” ni Catalina nga mihunong sa pagpanglugod.

“Dili pa dugay, lin,” hinay’ng tubag ni Fausto. Ambongan usab kini si Fausto ug susama ra sila’g panuigon ni Catalina. Ugaling lang sayo kaayong naminyo si Fausto kang Magda. Sa hilom usab dunay kaibog si Catalina kang Fausto, dugay na kini.

“Nindota nimo’g lawas, uy, Catalina,” padayag ni Fausto.

“Mao ba, aw, salamat, ha. Kuan, kuyogi ko sa pagkaligo bi, Fausto, sige na, ubani ko,” paraygon ang tingog sa dalaga may dalang tam-is nga pahiyom. Unya, ingon sa nadani si Fausto sa mga pulong ni Catalina. Hinayhinay niyang gihubo ang iyang t-shirt aron kuyogan si Catalina sa iyang pagkaligo. Ug miduol si Fausto sa nag-agas nga tubig sa tubod. (Katapusan)