Go to hell
Naghinangat ang Misa de Gallo. Kinahanglang pundohan og daghang stock nga gasolina ang gasoline station sa magtiayong Keno-Mayra sanglit kusog ang halin niini ning mga adlaw nga naghinangat na ang Pasko.
“Keno, molarga man ko sa Manila karong gabii, ikaw na lay bayad sa ideliber nga gasolina ugma sa buntag, ha? Oh, aniay P500,000,” tugon sa asawa.
Tuod man, gihatod sa bana ang asawa sa airport nianang pagka gabii. Ug dihang nakalupad na ang ayroplanong gisakyan ni Mayra, gaan ang buot ni Keno nga nagdrayeb sa multi cab pauli sa ilaha. Nalingaw siya’g pasiplat sa mga sugang dagitabnon nga iyang gilabyan. Daw nakighagwa kaniya ang nagkalainlaing bulok nga usahay mohawok sa windshield sa iyang sakyanan. Samot na, dihang iyang naagian ang mga kidlapkidlap sa dekolor nga signage sa kasino.
Dugay nang gibaoran si Keno sa iyang asawa nga dili na mosulod sa balay-sugalan. Dako na man gud ang kantidad sa ilang pundo nga nahilabtan sa bana, kinsa naungo na pag-ayo sa sugal. Gani kun wala pa lamay dinaliang transaksiyon si Mayra didto sa Manila, dili man gyod unta niya itugyan ang kuwarta para bayad sa gasolina. Hinuon dugay nang misaad si Keno nga mohunong na sa iyang bisyo. Mao nga kompiyansa ra si Mayra.
Malipayon ang mga gutlo dihang sunodsunod nga midaog ang taya ni Keno. Miabot nag milyon iyang daog. Apan tungod sa kahangol wa gihapon moundang. Hangtod nga pag-abot sa demalas hasta iyang puhonan nahurot.
Huyhoy ang abaga ni Keno nga miteks sa iyang asawa nagpahibalo sa maong hitabo. Nahayblad si Mayra pagkadawat sa makapakonsimisyon nga mensahe. Gibinaboy pagkasaba pinaagi sa teks ang sugarol nga bana. Iyang giingnan si Keno: “GO TO HELL, SON OF A BITCH!”
Pagka buntag sayo, naggubot ang taga Gaas sa Transcentral Highway dihang may nakita silang usa ka lalaking wala nay kinabuhi sulod sa multicab nga nakaparada daplin sa karsada ilawom sa kabiyatilisan. Gisakitan si Keno sa gisulti sa asawa mao nga naghikog siya. (Kataposan)
- Latest
