Kasingkasing sa lubnganan

Nananghid si Monico sa iyang hinigugma nga si Leonila nga molarga sa laing nasud sa Australia kay motrabaho isip usa ka welder.

“Leonila, moadto ko didto sa laing nasud motrabaho aron makatigom og daghang  kwarta,” ni Monico. “Akong isaad nga inig pauli nako magpakasal ta!”

“Sige, amping baya ha?” ni Leonila.

Tuod nilarga sa laing nasud ang ulitawo para makatigom og daghang kwarta. Ug nikilab sab ang mga adlaw, gimingaw si Leonila sa iyang hinigugma nga nagpaabot sa mga saad.

Pagka sunod adlaw gisugo ang dalaga sa iyang ginikanan nga moadto sa lungsod aron mopalit og mga prutas ug lagutmon. Pagkahuman niya’g pamalit nipauli dayon ang dalaga ug natayming nga nisakay siya sa traysikol sa suod niyang higala nga ang driver mao si Benjie. Apan sa kalit lang ningsiga ang mga mata ni Leonila kay nakita niya si Monico nga tulin nga nagpadulong kaniya.

“Monico, nia lagi ka, wala man ka mopahibalo nga mopauli ka!” ni Leonila.

“Dili na importante, Leonila. Basta nia magpakita ko nimo kay gimahal ko ikaw,” ni Monico. “Adto dayon sa amoa kay aduna kay sinugatan!”

Pilay estorya gikasugat niya ang iyang ginikanan padulong sa ilang silingan, mao nga siya na lang usa ang nahibilin. Ug niinom usa siya’g tubig, apan nabuhian ang baso. Dangta’g pipila ka segundos may niabli sa pultahan pero walay tawo nga nakita. Pagkataudtaod ingon sa adunay nihalok sa hangin sa kaapingan sa dalaga ug niukob sa ngabil. Kalit siyang gikulbaan ug daling niadto sa pinuy-anan ni Monico. Ug daghang tawo nga iyang nakita. Unya nasiplatan niya ang lungon duol sa balay sa ulitawo. Gikulbaan si Leonila ug giduol siya sa inahan ni Monico nga si Petring.

“Leonila, namatay ang akong anak, kay naligas ang tiil sa taas nga edepisyo nga iyang giweldingan mao nga nahulog,” pasabot ni Petring.

“Monico, kasakit ba sa atong panagkita kaganina nga usa na man diay ka kalag. Pagkapaet ba sa imong sinugatan,” ni Leonila. “Diyos ako kun mahimo dad-a ang akong kasingkasing sa lubnganan!”. (Kataposan)