“Dunay senior citizen ninyo, ma’am?” ni Danny ngadto sa babaye nga nikuot sa iyang bag aron mobayad sa ilang gikaon rong gabhiona. Nahatag na niya ang “chit” kun pila ilang bayranan sa panihapon. Nipasiklap si Danny sa tupad sa babaye sa iyang wala nga sa tan-aw ni Danny maoy bana ug maoy senior citizen. Puti ug semi-opaw na ang buhok sa lalaki ug sobra na gyud og 60 ang edad niini, sa banabana ni Danny. Nag-apas man god siya’g dakudako nga tip kun mapahinumduman niya ang mga customers nga senior citizen, sa ilang ID. Kay kasagaran mohatag man gyud og tip kun dako’g ma-discount ang mga customers ning Green Meadow Restobar nga gialagaran ni Danny isip waiter.
Alas 6:30 ganihang sayong gabii ang pag-abot sa mga customers dinhi sa kan-anan. Unom sila ka tawo. Kining bana’g-asawa nga mora’g senior citizen. May kauban nga batan-on nga lalaki’g babaye. Mora sab og bana’g asawa. May duha ka batang babaye.
Naobserbahan ni Danny nga hinayon na og lihok ang tiguwang lalaki. Kay dihang niadto siya sa CR, hinay na og linakwan. Ug medyo nihugo.
“Wa pay senior citizen namo, Dong”, sa babaye. Nipahiyom sa pagtunol sa kuwarta. Sa tan-aw ni Danny dugay pa ma-senior citizen ang babaye. “Hitsura ray senior citizen,” timang sa lalaki. Nipahiyom na. “Third class citizen hinuon gyud ko” dugang sa lalaki. “Unsa may ipasabot nimo, sir?” ni Danny. Nakighinabi na lang. Kay nakaamgo nga komedyante ang lalaki. Istrikto lang gyud hinoon og hitsura. Kun di magpahiyom, mora’g naglagot. “Kuan, Dong, kanang ang first class citizen, mas bata tan-awon kay sa iyang edad. Ang second class, sigo ra ang edad ug hitsura. Ang third class, sama nako, mas tiguwang tan-awon kay sa iyang edad. Singkwenta y nuybe pa ko. Apan mora na’g 70”, sa lalaki. “Imo ra na sir, ha? Ikaw ray nagsulti ana”. Mapahiyumon si Danny nga nidawat sa kuwarta gikan sa babaye.
Nagpahiyom gihapon si Danny nga nilakang padulong sa counter sa cashier sa kan-anan. Kay nakadayeg siya sa tawo nga nakadawat sa iyang hitsura.