Multo sa balay

Alas sayis sa  hapon. Nagsingabot na ang mga inimbitar ni Gina og panihapon. Kun maghikay si Gina, bisan unsang okasyon, dili niya alang-alangon. Kinahanglan iyang hikay bongga gyud, diin makakaon ang labing minus usa ka gatos ka tawo. Birthday karon ni Kevin, 5 anyos, kamaguwangan  ni Gina.

Wa ron iyang bana nga si Jessie kay tua pa’s biyahe. Chief Mate siya sa inter-ocean nga barko.

Alas otso sa gabii. Human nagkaon ang mga bisita. Nag-tsika-tsika na. Apan wa nahimutang si Gina. May kuwang sa iyang mga paryente–si Chona iyang suod nga ig-agaw.

“Ma, hain man diay si Chona?” ni Gina ngadto’s iyang mama Hilda. May kahingawa si Gina nga nangutana. “Ayaw na lang kahibulong anang Chona. Di na siya motambong sa mga hikay sa iyahang mga paryente” ni Hilda. “Ngano man?” “Nakasala siya’s mga katigulangan. Sa mga hikay sa imong tiya Helen, tiya Patty ug tiya Wenda, wa siya nitambong. Wa na siya’y nawong ikaatubagn nila”, ni Hilda. “Unsa may sala niya?” “Pagbinahinay sa yuta sa imong lolo Minong, ang bahin ni tiya Nena nimo, gipabor niyang Chona. Gibaoran sa iyang mama nga di gyud ipabaligya. Kay maoy tugon sa imong lolo. Kun ibaligya man gani, adto sa kadugo nato. Gibaligya man ni Chona sa laing tawo. Nag-apas sa dakong kantidad”, ni Hilda.

“Mao ra diay na iyang sala? Di man tingale na bug-at salaa”. Ni Gina. “Dili bug-at. Pero nagmulto na si tatay Mining sa balay nga gipatukod sa nakapalit sa yuta”. “Kuyawa god!” “Nahimo na siyang sumsuman sa mga tsismis sa atong mga paryente. Iyang mama pwerte nang sukoa niya”.

Nakahinuktok og lawom si Gina sa kahimtang sa iyang paboritong ig-agaw. Nakahukom siyang tambagan ang ig-agaw nga ipapalit og balik ang yuta. Kay overseas man sab iyang bana.