Yukbo kang Senyor Santo Niño

Atol sa kasaulogan sa Pista Senyor, ania na usab si Naldo  sa simbahan sa Basilica Minore. Kadlawon pa siyang apil sa linya sa daghang debutos ni Senyor  Santo Niño aron lang mohalok sa  imahen sa milagrusong Balaang Bata. Ug naudtohan siya, una pa mahiabot sa atubangan sa imahen.

Nagkibutkibot dayon ang baba ni Naldo nga mihalok sa bildong urna, atubangan sa imahen sa Balaang  Bata.

Human makayukbo ug makahalok sa imahen, miuliot si Naldo sa dasok nga mga tawo paingon sa agianan sa exit area, diritso sa atubangan sa simbahan. Niadtong orasa, misulbong na sa kadalanan ang lagubo sa mga tambol sa gisugdan na sa pagparada ug pagsinulog sa tanang contingents sa Sinulog          Festival. Nagpalit si Naldo og kandela. Gidagkotan. Sama sa naandan, nagsinulog siya. Atras-abante ang iyang sadsad nga nagwarawara sa dinagkotang kandela ug misinggit sa kusog nga tingog:

“Akong yukbo kanimo, Senyor Santo Niño! Pit Senyor! Viva Senyor!” Gihimo ni Naldo ang tinuig nga pagyukbo kang Senyor Santo Niño, gumikan sa wa damhang kalampusan karon sa kinabuhi. Gikan sa pagpamasura sa kada adlaw sa kadalanan, napunitan niya ang usa ka gamay nga imahen ni Senyor Santo Niño sa tambak nga basura, uban ang usa ka puntil sa bulawan. Gikan niadto, nausab na ang dagan sa kinabuhi ni Naldo nga usa ka ilong tuwapos. Gibutang sa  gamay’ng altar ang imahen ni Senyor Santo Niño ug giampoan matag adlaw. Nakatapos siya sa pag-eskuyla sa kolehiyo sa kursong mechanical engineering. Ug nunot sa pagsangpit niya kanunay kang Senyor Santo Niño, nakapasar siya sa board examination ug nahimong lisensiyadong mechanical engineer. Nakapanag-iya siya og duha ka dagkong auto machine shop sa siyudad. Nakapatukod og mansyon nga balay uban sa iyang asawa nga usa ka doktora sa medisina. Nakabaton siya’g tulo ka mga anak, duha ang lalake ug usa ang babaye nga pulos na usab mga propesyonal. Gawas sa  iyang tinuig nga pagyukbo kang Senyor Santo Niño atol sa kapistahan, mosimba usab matag Biyernes si Naldo uban sa iyang asawa ug mga anak sa Basilica Minore. (Kataposan) - Jethro Barita Ochea - Lalawigan sa Sugbo