Kaluy-i ko, Senyor Santo Niño
“Kaluy-i ko, Senyor Santo Niño...!” mao kini ang singgit pakitabang ko niadtong mapait nga trahedya sa kadagatan, diin usa ko ka pasahero sa nalunod nga lantsa nga M/V Bethoven nga naglawig gikan sa Leyte aron unta modunggo sa pantalan sa kanhi lungsod sa Bogo (karon Bogo City na), mga 40 na ka tuig ang nakalabay. Katorse anyos pa ako niadtong higayona ug diha na ko sa ikatulong ang-ang sa hayskol.
Uban sa akong iyaan, mikuyog ko nga miduaw sa among paryente sa Matalom, Leyte nga may halapad nga basakan sa humay. Mituyo ko’g absent og tulo ka adlaw sa among eskuylahan uban sa pagtugot nilang Tatay ug Nanay, kay nanugon lagi ang among paryente nga hatagan mi og tagsa ka sakong bugas humay kun mahiduaw sa Matalom. Ug gikan sa pantalan sa Matalom, misakay mi sa lantsang M/V Bethoven nga puno sa mga pasahero ug daghang kargamento. Kadlawon na kadto. Tungatunga sa lawod sa Leyte ug Bogo, natugaw ang paglawig sa lantsa, dihang kalit lang nga may milugapak. Dayon, inanay nga mitakilid ang lantsa. Midahili ang mga pasahero sa teheras, lakip na ang mga sinakong kargamento sa semento ug mga ginabas nga mga tabla. Nagsinggitay dayon ang mga pasahero.
“Kaluy-i ko Senyor Santo Niño...” singgit ko nga migunit sa gikwentas kong imahen ni Senyor Santo Niño, nga naandan ko nang isul-ob matag adlaw. Wala ko na makita ang akong iyaan. Miawop ang sininggitay, hinilakay, minatay, sa mga pasahero. Milamwas nako ang tubig sa dagat. Namasin ko sa pag-ulpot ug milangoy. Swerte nga nakagawas ko sa lantsa. Paspas kong misikad. May tabla kong nagunitan ug mao kini ang gihimo kong gabayan sa paglangoy ug paglutawlutaw sa dagat. Hangtod nga nadagsa ko sa baybayon sa Bogo. Daghang mga pasahero nga nangamatay, lakip na ang akong iyaan. Sa hilom, nakapasalamat ko ni Senyor Santo Niño nga iya kong gikaluy-an ug giluwas sa maong trahedya. (Kataposan) - Jethro Barita Ochea - Lalawigan sa Sugbo
- Latest
