Bugnaw ug tin-aw kaayo ang tubod sa Maghumot. Ang mga lumolupyo dinhi sa sityo Layang Takong anha magkuha’g tubig sa tubod alang sa ilang mainom ug ilung-ag.
Anha pud sila maligo, manglaba ug ang uban magdala sa ilang mga binuhing kabaw ug baka aron anha dinha paimnon sa tubod. Ug ang tanang mga dalaga ug ulitawo dinhi sa sityo anhi pod magtagbo aron magpaduding sa tagsatagsa nila ka tinguha. Ug dinhi sa maong tubod gipakyas si Masyong ni Adelaida. Guwapa kini si Adelaida ug daghang naibog. May pagka maldita ug estrika kini nga pagka dalaga. Himilian pod siya. Ug kutob sa guwapong ulitawo nga manguyab niya iya dayong sugton. Ug si Masyong kay bati ma'g nawong iyang gibalibaran ug giinsulto. Igo lang sa pagpatulo sa iyang mga luha si Masyong ug mibiya sa tinubdan.
"Ayaw na lang hunahunaa si Adelaida, Bay Masyong, kay dili ka man gyod kadama ana niya. Mamili man na siya'g guwapo. Naa ay, iya karong uyab sila si Philip, Junjon, Alex, Pol, Matteo, Piolo ug uban pang mga guwapo dinhi sa ato, ug klaro kaayo nga palakira kana siya, Bay Masyong," ni Tomas ngadtong Masyong. "Lisod nako siyang kalimtan, Bay Tomas," hinay'ng tubag ni Masyong. "Nganong lisod man, nga dili pa mo uyab?" ni Tomas nga mitutok sa higala.
Ug mao kadto nga dili na lang magduolduol si Masyong kang Adelaida. Unya usa ka mamingaw nga hapon nga si Masyong rang usa ang diha sa tubod, may nagpakita kaniyang guwapang babaye. Ug nagpaila kaniya nga maoy tag-iya sa tubod.
"Amo kining tubod, Masyong," niini pa. "Usa ako ka engkanto, ug naluoy ko nimo. Sige lang kay gipakyas kang Adelaida, duna may nahigugma nimo, ug kanang bayhana mao ako. Karon, dad-on ko ikaw sa among gingharian. Biyuda ko, Masyong. Ugma, malubog kining tubod ug si Adelaida kay maligo man siya dinhi, makakuha siya'g sakit sa panit nga makahimo kaniyang kagiron ug likayan na siya sa mga lalaki..." (Kataposan)