Ania na usab si Efren sa karaan nilang balay ug alang kaniya malab-as dayon sa iyang handurawan ang nangagi ug kini mao kadtong mga higayon nga iyang gikauban ang iyang mga mahal sa kinabuhi.
Sila si papa niya Teofilo ug mama niya Sedeng. Ang duha ka igsuong babaye nga sila si Perla ug Carlota duna nay iya-iyang pamilya ug tua na sila mopuyo sa ilang kaugalingong mga balay. Ug ning iyang paghiuli, dili gyud niya tuyoon nga motulo ang iyang mga luha kay dinhi gud sa karaan nilang balay aduna may nindot kaayong mga handumanan sa iyang gugma. Dinhi man gud niya dad-a si Lolita, ang babaye nga iyang gimahal ug gihigugma apan wala kini hiayoni sa iyang papa ug mama. Kanunay lang kining makadawat og dili maayong mga pulong gikan sa iyang mga ginikanan, ug si Lolita igo lang mopatulo sa iyang mga luha. Ug tingali wala na makaantos si Lolita mihinok kini'g biya sa ilang balay.
"Pa, Ma, bisa'g unsay inyong isulti o ibugnaw ninyo nako bahin kang Lolita, dili gyod mausab ang akong gugma kaniya. Gimahal ug gihigugma ko siya. Pangitaon ko siya, Ma, Pa..." Ug mihangos si Efren nga naghilak.
Dugay na kadto. Ug karon sa iyang pangidaron nahimo siyang ulitawong guwang kay ang iyang kasingkasing didto ra man gyud kang Lolita mipitik. Unya, sa iyang paghandum sa nangangi may mga tunob misaka sa hagdanan ug nanagko ang iyang mga mata kay mao may misugat sa iyang panan-aw ang binuhat nga iyang gikamingawan si Lolita.
"Lolita, ikaw kini, di ba?" kahilakon si Efren sagol kalipay. "Oo, Efren, ug sa kadugay sa mga adlaw nga wala na kita magkita kanunay ko ikaw'ng gihandum. Efren, naningkamot ko nga mahimong propesyonal. Mieskuyla ko, ug karon usa na ako ka professor sa usa ka unibersidad. Nia ko, aron balikon ta ang kagahapon, sumpayon ta pag-usab ang kutay sa atong gugma," ug migakos si Lolita kang Efren kinsa migakos usab kaniya. (Kataposan)