Dili ko gusto’g dagat ug kini kaniadto pa
Bisan gani sa mga picnic nga imong gitagana wala ko moadto
Kay nahadlok ko nga sama unya sa kaparat sa dagat
Matilawan ko ang hingpit nga kapakyasan
Apan namugos ka ug gidala mo ako sa lapyahan
Ug didto gihampak ako sa mga balod
Nalagpot ko paingon sa bunbon ug ikaw ...
Ug ikaw nahilayo kanako
Mao ba kadto ang giingon mong nindot ang dagat?
Bati ang dagat, uy,
Kay dunay mga balod nga motugaw sa atong paglangoylangoy
Parat usab ang iyang tubig.
Unya sama sa dagat imo kong gibiyaan
Gisunog mo pa ang matahom tang handumanan
Nga unta sila mao may mga gapnod sa baybayon nga nindot handumon
Ug nahimong halandumon sa higayon nga ang kamingaw sakit nga moangkon sa bililhong mga gutlo
Ingon ka ako ra g yod ug wala nay lain
Ingon ka bisan pa ang kamatayon dili makababag sa atong gugma
Apan namatay na kini nunot sa imong kamabudhion ug ang gipanghambog mong dagat mabiaybiayon kanakong nagmalaumon, ug karon sama kaniya, sa kaluha mong dagat
Ako nahimong lawod sa mga luha diin ikaw igo lang mikatawa
Samtang ako rang usa naglangoylangoy ug nagdunguyngoy.