Wonder old man

“Bakit ngayon ka lang sumali sa isang singing contest?” ni Vice Ganda ngadto ni Novie paghuman niya’g kanta. Siya karong hapona ang representante sa Visayas. Hilom nga mapasalamaton sa Diyos si Novie kay nakahuman gyud siya’g kanta nga wa nitingog ang gong. Mao ray iyang giapas. Nga makakanta, makasalmot sa Tawag Ng Tanghalan, nga di mabagtingan. “One In A Million You” iyang gikanta.

Sobra napulo ka tuig iyang pagkantakanta ini. Wa pa nilurang iyang kulba. Nisidlak ang pipila ka lusok singot sa iyang agtang. Namugnaw iyang kamot. Nipahiyom si Novie nga nitotok ni Vice Ganda aron motubag.

Angayan gyud nga mangutana si Vice Ganda kay tiguwang na si Novie. Saisenta na iyang edad. Mora pa gyud siya’g 70 tan-awon. Nihangyo siyang Vice Ganda pinaagi sa sulat nga ma-exempted sa audition. Nagpadala lang siya’g CD nga may mga kanta niya nga gi-record kaniadto sa Videoke King. Sa VTR niya, niingon si Novie nga “sumali ako sa programang ito para masubokan ang sarili, kung magaling pa ba ring umawit sa harap ng malaking audience at mga judges.”

May silingan siya nga tiguwang biyudo. Tigpatanto sa merkado sa ilang lungsod. Ang iyang hobby, kantakanta. Maayo si Noy Jose mogunit og ukelele. Maayo siyang mokanta. Nindot og tingog. Ginganlan siya’g “Wonder Old Man” sa ilang barangay. Bag-o lang namatay si Noy Jose sa edad nga 87. Nakahukom si Novie nga siya na say magpaka-Wonder Old Man.

“Ngayon ko lang nalaman na ang Tawag Ng Tanghalan, pagandahan ng boses, hindi sa mukha” ni Novie. Mapahiyomon. “Ha! Ha! Ha! Ha! Ha! Ha! “Puwerteng bahakhak og katawa nilang Vhong Navarro, Vice Ganda ug Anne Curtis. “Talagang Wonder Old Man  ka, Mr. Novie Rambot” ni Vice Ganda.

Kay nakaluwas si Novie sa kanta nga wa na-gong, dili na siya mahadlok mokanta dinhi pag-usab. Bisa’g di siya kadaug karon, mosalmot siya’g kadaghan, kutob sa makaya. “Try and try until you die” iyang motto. Kay hapit na siya moretiro sa iyang trabaho isip CPA.