Pagpaingon nako sa eskuwelahan mihapit pud ko'g pamasura nakapunit ko'g daghang puthaw. Ako lang gibutang sa kilid sa eskuwelahan unya ako gitabonan og mga sagbot aron dili makit-an sa uban maong paghuman sa klase akong gitultol pagbalik unya akong gipatimbang. Unya namasura na sad ko'g hapit paingon dinhi sa ato maong nakapunit sad ko'g danghang lata. Ako nang ipatimbang ugma ma mohapit ko sa timbangan. Mosayo gihapon ko'g lakaw ugma ma ha," matud pa sa inosenting si Bernabie. Wala makapugong si Dorina inanay na usab nga mitulo ang luha nga nagtutok sa anak sa kalinghod pa sa pangisip ni Bernabie, nagpakita na kini kun unsa ka responsabling anak ug igsuon si Bernabie milingkod si Bernabie tapad sa inahan. "Nganong mihilak man ka ma?" ni Bernabie pa daling gipahiran ni Dorina ang aping nga nabasa sa luha."Wala, wala anak sige na lakaw na didto naay ginamos sa lamesa pagmaneho lang didto. Nahibawo kong gigutom ka pero pasensiya na ha dukot ra tong kan-on," matud pa ni Dorina.
"Okay ra na ma oy haylasbig wa juy kan-on di ba?" matud pa ni Bernabie.
"Aw kaligo lang una didto kay nabasa ka baya sa uwan una ka mukaon," matud pa sa inahan. Mitando lang si Bernabie tuod man naligo si Bernabie, nagpasalamat usab ang bata kay mituang na ang uwan samtang si Dorina usab human makita si Bernalyn nga nahinanok sa pagkatulog migawas kini sa balay aron mopalit og tambal sa gihilantang anak. Unya human og kaligo ni Bernabie, nag-ilis ug nagsige'g tan-aw sa manghud nga gihilantan mura'g nawala na ang pagpangurog sa iyang manghud. Sa wala pa motangka sa lamesa si Bernabie, mihapuhap kini sa aping sa manghod ug mihalok nga nagkanayon, "inday, I love you. Pinangga ka ni kuya ayaw na hilanat-hilanat ha?" ni Bernabie pa dayon mipahiyom ug mibarog. Miadto sa lamesa nga duol ra sab sa gihigdaan sa manghud. Ang kusina, sala ug kuwarto sa ilang balay usa ra. Busa samtang nagkaon lingion ni Bernabie ang manghud panagsa sa iyang gihigdaan. Unya human makakaon nanghugas sa iyang kinan-an gikuha niya ang gamay'ng tubo nga plastic mao say pag-abot ni Dorina nga nagsige'g ubo. "Ohhh dong Bernabie humana ka'g kaon?" ni Dorina pa nga may bitbit nga gamay'ng plastic nga gisudlan sa tambal "oo ma," tubag pa ni Bernabie.
"Nagdala man ka anang gamay'ng tubo unsaon mana nimo?" si Dorina nga mipuntarya ngadto sa gihilantang si Bernalyn. Gihikap aron pagtino kun init pa ba gihapon kini nanghupaw si Dorina nagpasalamat kay milurang na'g gamay ang kainit sa anak. "Ma, mananghid ko nimo adto ko ilang nang Vicky," matud pa ni Bernabie. "Mag-unsa ka man sa ilang Vicky?" pangutana sa inahan nga gikuha ang uga nang linabhan aron pil-on ug mahatud sa tag-iya sa mga labada.
"Ako man to siyang giingnan nga moangkat ko niya'g sampaguita unya nisugot man siya. Maong moadto ko kay moangkat ko niya'g sampaguita, akong ibaligya sa Santo Niño," matud pa ni Bernabie. "Pero dong basin mouwan na sad ron mabasa na sad ka," matud pa ni Dorina mipaingon sa gamay'ng bintana ang bata ug gilili ang gawas mihangad sa langit. "Wa na may dag-um ma dili na siguro ron mouwan oy," matud pa ni Bernabie nga mopaingon sa nahimutangan sa iyang inahan aron mo-amen una mogawas sa balay. "Nak, pasensiya na ha," matud pa ni Dorina nga nagsige’g ubo. "Ha? Ngano man?" pangutana pa sa inosenting si Bernabie.
"Pasensiya na sa atong kapobrehon unsaon nga wa man tay laing mahimo," matud pa ni Dorina nga padayong namilo sa mga senina."Sige lang ma maningkamot ko moeskwela jud ko'g tarong kita ka anang balay inig gawas nato dinhi sa ato? Magpatukod ko'g ingon ana nga balay nga dako unya naa tay awto unya lami atong sud-an permi. Unya si inday dili na mahilantan kay dad-on man dayon nato sa hospital kay naa man tay kuwarta nga ipahospital ni inday," matud pa ni Bernabie nga sa pangidaron maoy pangandoy nga madato. (Sumpayan)