Pagbaha sa gibati - Gula 141

“Lola,” bugtong pulong ni Diane nga nakurat nga gisinghagan sa apohan.

“Ayaw pagsalga kay natapos na ang imong trabaho pagpakahilom kay wa kinahanglana ang imong kumento,” matud pa sa Senyora.“Lola kaalyado ta nganong...” wala matiwas ang gisulti kay gisigahan siya sa mata sa apohan. “Lingkod Diane pasagdi sila si mama ug si mama mo Mylene nga magsultihanay,” kalmadong pulong ni Ferdie. Mituman na lang si Diane way nahimo ug nahilaw ang dalaga milingkod atbang sa gilingkuran sa iyang amahan. Mibalik ngadto kang Mylene ang atensiyon sa senyora. “Unsay imong gustong akong buhaton human ko masayod sa tinuod mong pagkatawo Mylene? Gusto ka ba nga hatagan ko kamo’g kamay si Ferdie tungod sa inyong gibuhat nako? Nagplano ka pa nga ibutyag ang tanan ninyong tinaguan atol sa party ugmang adlawa? May plano ka pang gub-on mo ang akong party? Apan dili na kana mahitabo kay kanselado na ang maong party,” matud pa sa senyora. “Wala ko magpaabot nga pasidunggan ko nimo mama wala ko magpaabot nga trataron ko nimo sama kaniadto. Gipangandaman ko na kining daan nahibawo ko nga dako kaayo ang sala nga akong nabuhat ninyo sa sinugdanan pa lang. Gusto kong isulti ninyo ang tinuod nakong pagka-ako  apan tungod sa dako kong gugma sa inyong anak nga nahadlok nga inyo siyang isalikay ug inyo kong isalikway ug sa kahadlok nga ipalayo ko ninyo kaniya kay matud pa niya mamatay siya kun mahanaw ko niya sa hingit mao usab kana ang akong gibati mamatay sab ko kun mahanaw nako ang lalaking natingban nako sa tanan nakong paghigugma. Ang lalaking maoy gitugyanan ko sa akong pagkababaye giuyonan ko siya sa iyang gusto. Giuyonan ko siya kay sama kadako sa iyang pagbati diri nako mao usab kadako sa akong gugma niya. Gugma ang nagtukmod kun nganong gililong namo ninyo kining tanan kun nganong gipasagdan namo nga mokabat sa kapin sa 20 ka tuig nga among gisekreto kining baho akong pagkatawo. Nagpakasala mi si Ferdinand ninyo tungod lang sa among gugma sa usag-usa,” matud pa ni Mylene nga naglumbaanay na pag-agas ang mga luha.

“Maong dako kang uyon sa pagpakigrelasyon ni Kyle kang Pia kay managsama diay mo,” matud pa sa senyora. “Tungod kay nakasabot ko kun nganong nahipunta si Pia sa maong trabaho. Nakita ko ang akong kinabuhi kaniadto pinaagi kang Pia mama. Usa usab sa mga rason dili ko katugotan nga sama sa among gibuhat ni Ferdie mahitabo usab ngadto kang Kyle. Dili ko makatugot nga sama sa among gibuhat ni Ferdie limbungan mo. Sama sa nahitabo namo ni Ferdie kahatagan og katumanan ang ilang gugma sa usa’g-usa,” matud pa ni Mylene nga mibakho na  midugang nga nagkanayon “dili sala ang paglunang sa lapok aron lang may tiyan nga mabusog. Dili sala ang pagbulit sa kaugalingong lawas sa lapok lamang kahatagan sa iyang panginahanglan ang mga tawo nga nagkinahanglan kaniya. Ang nahimo lang sala sa sama namong naa sa lapokong dapit mao ang among kakabos. Sa among pagkatawo sa among nahiaguman nga kasakit isip tawo, dili kalikayan nga kamahayan namo ang Dios kun nganong wala niya ipataas ang tanang tawo nga iyang mga binuhat. Kun nganong may kabos ug adunahan kabos nga nag-ilaid sa tumang kalisud diin adunay mga adunahan nga naglunang sa bahandi. Kun nasayod ka pa lang unta mama kun unsay bation sa sama namong kabos nga ang suok sa panimalay maoy bugtong kadangpang dapit aron ipabuhagay ang among gibating kasagmuyo ug kahiubos sa kalibutan tingali makasabot ka. Pagkasuwerte ninyo kay kamong mga adunahan wala mo makasinati nga nangapawot ang inyong mga kamot sa paglinaba nangiyawat nga may madawat nga pipila ka piso agi-g suhol sa pagpanglabada aron may malugaw mi ug matambalan ang nagkutoy namong mga tiyan. Pagkasuwerte ninyong mga adunahan kay wala mo makasulay nga naahaw mo sa lamiang pagkaon diin langit para namo kun makasuwa mi og humba bisan og ingon pa kining gidak-on sa kumagko. Apan salamat sa among kakabos kay nahimo ming lig-on mapasigarbohon ko nga nahimo kong kabos kay makamao kong motan-aw sa kalisud sa tawo,” taas nga pulong ni Mylene dayong mitalikod paingon sa kuwarto niini. Wala makatingog ang senyora nga nakabati sa gipamulong sa umagad. Miduko kini ug milingkod tupad kang Ferdie gilingi ni Ferdie ang inahan nakamatikod ang lalaki nga may luha ang mga mata sa senyora. (Sumpayan)