Milagroso

Alas sayis sa hapon niabot si Atty. Kevin Rago sa ilang balay gigrahe ang kotseng gimaneho. Mao ni kasagarang oras iabot niya sa ila gikan sa iyang bupete sa Mandaue.

Alas kuwatro kasagarang ibiya niya sa opisina padulong sa barangay Baring, lungsod sa Carmen diin nahimutang ilang balay.

Nisaka siya's ikaduhang andana sa balay diin tua ang lawak nila sa iyang kapikas nga si Ursula. Alas siyete pa mauli sa Ursula kay nag-atiman pa sa ilang tindahan sa merkado. Naghukas si Kevin sa iyang sinina para trabaho, aron pulihan og para oran. Nahibulong siya nga nidagan ang kuwentas sa iyang liog. Gihikap niya ang pendant tungod sa iyang dughan. Nahanaw. Niatubang siya sa samin. Wala na iyang pendant nga krus nga white gold. Kadina na lang sa kuwentas ang nahibilin. "Diin man kaha to mahulog?" nakapangutana siyas iyang kaugalingon.

Gianugnan siya sa krus. Kay dili to niya pinalit. Hinatag sa iyang kliyente nga si Claro Soler. Dili to bastabasta nga ihatag sa tag-iya kun dili dako'g pagtahod sa tawo nga gihatagan.

Natanggong si Claro og unom ka bulan sa bilanggoan. Niya pa, giplanteran siya'g shabu sa barangay tanod nga nasuya niya. Enkargado siya sa mga balay  paabangan sa iyang maguwang nga tua sa Germany. Unom ka bulan una napiyansahan si Claro kay dugay naaprobahan ang motion ni Kevin sa  pagpaminus sa piyansa. Ug duha ka tuig una ang nakalabay una nabasura ang kaso. Walay tanod nga nanistigos batok ni Claro, kay tinood nga planted ang ebidensiya batok niya.

"Ako ning ihatag nimo ang krus. Kay dako ni'g gikatabang nako sulod sa bilanggaon. Milagroso ni", ni Claro nga nagtunol sa kuwentas ngadto sa abogado. Usa ka bulan ang nakalabay gikan sa pagsul-ob ni Kevin sa kuwentas. Unya, karon nahanaw lang nga wa siya kamatngon kun diin o kanus-a nahulog.

"Dili tingale ko angayan nga mosul-ob adto. Maong nawala lang. Ug basin may mas nagkinahanglan pa sa panabang sa gahum sa maong krus o sa milagro niadto" ni Kevin paghuman niya'g sul-ob og short pants ug sleeveless nga kamisin. (Kataposan)