Mga sugyot

Domingo. Alas dos sa hapon. Daghan nang nanulod nga mga miyembro sa Spiritual Truth Fellowship, sa dakong bodega nga gihimong simbahan ni Pastor Romy Gabay. Di madugay, sugdan na ang prayer meeting o Bible Study nga pangulohan sa pastor. Pamilyar ni Romy ang mga nawong sa kadaghanan.

“Maayong hapon kanatong tanan. Puwede na ta magsugod”, ni Romy nga nagtungtong sa gamay’ng bantawan nga mao ra sab ang pulpito. May hamtong lalaki nga singkwentahon ang pangidaron nga karon pa nakita ni Romy. Naglingkod sa ikatulong laray sa lingkuranan gikan sa atubangan. Duol sa tunga nga pasilyo. Niisa sa tuong kamot ang lalaki. “Naa kay gustong isulti brod?’ ni Romy. “O, pastor” sa lalaki. Nagpahiyom. “Sige. Tindog. Pagpaila lang sab”, ni Romy.

“Ako si Gary Conde. Nagpuyo ko sa silingang baryo sa Pasaman. Inimbitar ko ni Brod Hernan”, sa lalaki. Gitudlo ang naglingkod sa iyang wala. Nipahiyom si Hernan. “Duna unta ko’y isugyot,  pastor” ni Gary. “Unsa man?” ni Romy. “Nga ang Bibliya ato gyung tun-an sa husto ug tininuod nga paagi. Dili nato koridason pag-ingon nga ang Bibliya lunlon pulong sa Diyos. Kay naa man gani diha mga pulong ni Satanas,” ni Gary. “Unsa pa, brod?” ni Romy.

“Dili sab nato lubagon ang Bibliya. Daghang mga sulat sa apostoles diha nga atong ginganlan nga pulong sa Diyos. Kay ang Bibliya mismo nagsulti kun unsay pulong sa Diyos diha sa Bibliya. Dili nato butangan ang baba sa Diyos og mga pulong nga wa niya nalitok. Kun moingon ta ang sulat ni Pablo, pulong sa Diyos, kanus-a man nahimong Diyos ang usa ka apostol? Ug kanus-a man na-demote ang Diyos sa pagka-apostol?” ni Gary. Nilingkod.

“Unsa man diay imong tinohoan, broad?” ni Romy. “Binunyagan man kong Katoliko. Pero wa pa ko nagpabunyag og laing tinuohan”, ni Gary. “May punto ka sa imong sugyot. Ako nang ipasupot ngadto’s among Pastor General” ni Romy. “Unsa kadugaya na kang nagbasa og Bibliya?” ni Romy. “Sobra bayente ka tuig na. From Genesis to Revelation. Balikbalik”, ni Gary.