Dili tibuok og utok

Hapit na ang piyesta sa lungsod sa Amiraw habagatang Sugbo. Tungod sa daghang lutuonon ug daghang hugasan dako'g purohan nga may managsilingan nga mag-ilog og katabang. Sama nilang Cora ug Mira.

Ang suki nga labandera ni Cora si Edna nga single mom may tulo ka anak lainlain og amahan. Ang dapit labhanan ni Edna ug hayhayan sa mga linabhan, duol ra kaayo sa pultahan mayor sa balay ni Mira. Ang katabang ni Mira si Rita, senior citizen na. Di na kapiog og kusokuso sa mga bulingong sinina busa si Edna nga wa pay kuwarenta ang edad mahangyo usahay ni Mira sa paglaba.

Sa katapusang pagpalaba ni Edna sa mga bulingon ni Mira, gihangyo ni Mira si Edna. "Kun di ka kuhaon ni Cora para katabang sa piyesta ngari lang ka nako basta priority o prioridad gyud nimo si Cora," ni Mira. Nitando si Edna. Unya unsa bang pagkaunsaa nga pagkasunod buntag sayo nanukmat man si Cora ngadtong Rita, samtang naglung-ag para pamahaw.  Natulog pa si Mira? Gikulbaan si Rita kay duna ra bay kaagi nga nag-away ang managbayaw tungod sa intriga hapit maglinabnotay og buhok.

"Gikuha na diay ni Mira si Edna?" ni Cora ngadtong Rita sa pinasingka nga pangutana. Unsa man diay pulong ni Edna?  Niingon si Edna nga di na siya katabang nako sa piyesta kay gisabot na siya ni Mira, ni Cora.

"Unsay problema nang Cora? ni Mira nagmata na diay nanglugod pas mata nakadungog tingali sa sayong kulokabildo sa duha. Gibalibaran man gud ko ni Edna kay gikuha na kuno nimo, ni Cora. Malumo na ang tunada. "Di gyud diay tibuok og utok nang bayhana mao diay'ng matunto lang og lalaki daw naas bilahan ang utok kuyaw man siya makapaaway og managsilingan, ni Mira. Ok ra Mir oy si Rita nay nipasabot nako. Unsa ipatawag nato si Edna aron kasab-an? ni Cora. Ay na lang nang oy, angay lang nang kaloy-on. Duna gyud diay pobre nga tawo tungod kay di tibuok ang utok, ni Mira seryoso nitalikod kay gibati’g sugo sa lawas. (Kataposan)