Customer sa beach resort - Gula 129

Nakulbaan si Pia sa iyang nakita nganong naa man ang sakyanan sa mao niyang customer sa beach resort nila ni Kyle niadtong gabii nga nakita ni Kyle ang maong customer nga kuyog ang hinigugma? Wala kaayo niya maklaro ang kolor ug plate number sa sakyanan giparada ni Kyle ang sakyanan tupad sa maong mahalong sakyanan usab.

"Sigurado ka ba nga iya ning maong sakyanan Pia?" pangutana pa ni Kyle sa hinigugma.

"Dili ko mahimong masayop Kyle kay makapila na mi magkuyog nga kanang maong sakyanan maoy iyang dad-on," matud pa ni Pia nga wala mawala ang pagpangulba.

"Pero nganong nia man na dinhi?" Ni Kyle pa nga utrong nahibulong giablihan ni Kyle ang windshield sa sakyanan. Gipagawas niya ang iyang ulo gikan sa sakyanan gilantaw ang taas sa beach house nakita niya nga nagsiga ang suga sa may veranda nga sa ato pa may tawo sa taas. Dili gihapon nga pasigaan ang veranda kun way tawo. Ug panagsa ra sab nga muduaw ang usa sa miyembro sa pamilya sa ilang resort may kaugalingong yawe usab si Kyle sa ilang beach resort gipangulbaan ang ulitawo.

"Kyle, nagduda ko nga ang maong customer ko sa club nga mao usab nang nanawag nimo diin nagtuo ka nga ako gyuy nanawag aron pabation ka sa among inagulo sinugo sa usa sa imong pamilya," duda pa ni Pia.

"Mao sab nay akong pagduda Pia siya siguro ang kanunay manghulga nimo sa cellphone manawag ug mo-text," matud pa ni Kyle.

"Oo Kyle mao sab nay akong huna-huna kay sa higayon nga mag-ilis ko'g numero masayod man ang tawo nga manghulga nako kanunay. Sa akong nahinumduman gihatagan ko sab kanang akong customer kun magbag-o ko'g numero," matud pa ni Pia.

"Nagduda ko nga si daddy ang nagpaluyo niining tanan binayran niya kanang maong tawo," matud pa ni Kyle. Mikuha sa iyang cellphone ug gipangita ang numero sa inahan.

"Kinsay imong tawgan?"pangutana pa ni Pia. "Tawgan ko si mama kun naa ba si Daddy sa balay kun wala siya didto sa balay siyento por siyento nga siya kanang naa diha sa veranda kuyog sa maong sinugo niya," matud pa ni Kyle.

"Kaadlawon na karon Kyle. Siguradong naa siya sa inyo basin lahi na ang naa sa taas," matud pa ni Pia.

"Mahibaw-an nato na kun ikasulti ko na si Mama kadiyot," ni Kyle pa nga nagtapion sa cellphone sa iyang dunggan.

"Hello  Kyle anak? Kaadlawon na man ron  nanawag ka man?" si Mylene nga naa sa pikas linya. "Ma nia ko ron sa atong beach house sa Catmon," matud pa ni Kyle.

"Mao ba? Nag-unsa ka man diha?" ni Mylene pa sa pikas linya. "Kuyog nako karon si Pia," matud pa ni Kyle. "Mao ba? Unya? Nanawag ka man? May problema? Wala ka makasulod? Di ba may kaugalingon ka mang yawe diha?" mga pangutana ni Mylene.

"Nia ko sa sulod pero dili sa beach house dia pa mi sa sulod sa akong awto sa grahe," matud pa ni Kyle.

"Nan, unya? Unsa may problema? Mag alas kuwatro na sa kaadlawon  anak," matud pa ni Mylene."Naa ba si Daddy diha karon sa ato?" pangutana ni Kyle sa inahan.

"Oh nganong nakapangutana ka man?" ni Mylene pa. "Gusto lang kong masayud naa ba siya diha karon?" subling pangutana sa ulitawo.

"Wala si Daddy mo karon nag-out of town kay may gitan-aw kuno nga site para sa bag-ong project. Ugma pa to mupauli," matud pa ni Mylene. Misamot ang kakulba ni Kyle sa nadungog nga wala sa ila ang iyang amahan. (Sumpayan)