Love Story

Dear Banat News Hugyaw.

Hi sa tanang readers! Ako diay si M, 32 years old ug taga Cebu City.

Gusto nako –i share akong pait kaayo nga lovelife.  Upat ka buwan nako nga wala’y  girlfriend .

Ako lang i-share ang istorya namo sa katapusan nako nga nauyab nga si D, 27 years old.

Nagkaila mi niya kay nagkauban mi sa trabaho sa una sa usa ka boutique diha sa Ayala. Naganahan ko ni D, kay grabe ka-charming ug nindot pud og batasan.

Niabot og duha  ka buwan ang akong pagdiskarte kaniya ug grabe akong kalipay kay iyaha gyud ko nga gisugot.

Maayo ang dagan sa among relasyon, niabot na mi og upat ka tuig, gani nakahimo gyud mi og usa ka bata ug wala pa sad nasulod sa among hunahuna nga magpakasal. Sa among pag-live in, magsige na hinuon mi og away.  Usahay among lalisan kanang mangita siya permi og bikil.

Wala ko magdahom nga nausab ang iyang batasan, kun madugay gani ko og uli gikan sa trabaho, pasanginlan dayon ko niya nga duna ko’y laing babaye.

Kusog kaayo siya mohimo og istorya, para lang gyud naa siya’y rason nga mangaway nako.

Magsige lang ko paubos, dili nako dak-on ang among away, kay dili ko ganahan maguba ang among relasyon.

Pag-abot og unom ka tuig sa among relasyon, nisamot og kahilaw ang iyang tinagdan kanako.

Nahibulong ko, hilig na man siya molaag uban sa iyang barkada. Kun molaag gani siya, iyaha ra ibilin ang among anak sa among iyaan.

Taymingon niya nga molaag siya kanang inig trabaho nako para wala’y  makababag sa iyang paglaag.

Kun naa siya sa balay, nagsige na lang siya og atubang sa iyang cellphone, ug dili gyud na niya ipabasa nako.  Hangtud , duna na’y nakahunghung nako nga duna’y laing lalaki si D. Pagkadungog nako sa story, ako siya nga gi-confront .Pag-una kay mo-deny siya, pero ako gituyok-tuyok ang istorya ug niangkon gyud siya nga duna siya’y lain.  Niana siya nga  hagbay ra daw nahupas ang gugma niya kanako.

Wala ko kaantos, nihukom dayon ko nga mobiya na kaniya,  ug nisaad ko nga  mosustento sa among anak. 

Niuyon ra man pud siya nga magbuwag mi, wala siya nangayo og pasaylo kanako. Wala gyud siya mopugong sa akong hukom, busa nagtimailhan lang nga ganahan gyud siya sa iyang bag-ong lalaki.

Sakit kaayo ang iyang gibuhat, pero ako na lang dawaton, kay dili pud ko ganahan nga mouban sa tawo nga wala na’y gugma kanako.  Mo-request diay ko sa lyrics sa Kung Wala Ka by Hale.

Hi Mark ! Thank you so much sa imong LOVE STORY! Paabuta ugma puhon ang imong request.