Desisyon ni Erica - Gula 46

"Ayyyyyyyyyy!!!!.... sa wakassss naka-decide na gyud ang akong jumiga!!" Sa bayot pa nga pwerting lipaya nga halos mag-ambak-ambak sa kalipay.

"Hinaya ang tingog nimo bayot," pagbadlong ni Erica kang Melchora.

"Ayy eroshhh!" Sa bayot pa nga daling nanap-ong sa baba.

"Mosulod ko sa maong trabaho pero tudloi ko unsaon pagsayaw labaw sa tanan wala’y masayod bisan kinsa sa matang sa akong trabaho labaw na ang akong pamilya. Kinahanglang way usa nila nga masayod bayot himuon ta kining sekreto makalaum ba ko?" matud pa ni Erica.

"Sureness kamatis patis ug uban pang mga lamas kauban sa prutas!!!" sa bayot pa nga dayong posing ug mitaliyok dayong hinawak nga morag naa sa beauty pageant.

"Buhaton ko kini bayot tungod ug alang sa akong pamilya dili ko kini buhaton alang sa akong kaugalingon kun dili alang nila ug alang sa akong ambisyon nga makatapos sa akong pagtuon," matud pa ni Erica.

"Kun wala ka pa lugosa sa imong uyoan dili ka mosanong sa akong tanyag nimo," ni Melchora pa nga mihunghong sa babaye.

"Ayaw na pagsige’g balik-balik ana bayot. Kanus-a ko nimo pwedeng tudloan pagsayaw?" ni Erica pa."Sa mas labing daling panahon. Pakatulga sah ko adtoa ko sa balay karong alas kwatro sa hapon Okay?" ni Melchora pa.

Busa nianang hapon miadto si Erica sa gipuy-an sa bayot gitudloan sa mga basic steps sa pagsayaw isip dancer sa club. Dili man sab lisud tudloan si Erica kay humok kini og lawas. Sa elementary hilig na siyang mag apil-apil og sayaw sa eskwelahan.

"Vongga.. Imalia Fuentes kang mowayas day gamay’ng kiay pero lami na kaayo kang tan-awon mao na tong music nga imong sayawon ha. Can't be with you tonight by Judy Boucher paborito kaayo na nakong kantaha day," matud pa sa bayot. Milingkod sa sofa si Erica guol ang panagway. Nakabantay niini si Melchora  miduol sa dalaga ug mitupad sa paglingkod.

"Ngano ka oy, kalit man kang nagmagul-anon?" pangutana pa sa bayot.

"Kun dili pa lang unta mi pobre dili ko mosulod ining trabahoa," ni Erica pa"Hala ha magdrama na sad ta ini?" sa bayot pa.

"Dili ba gabii man ang duty ana bayot?" pangutana pa ni Erica."Alangan man og buntag kinsa kahay butakal manulod sa club sa mga oras sa buntag no?" matud pa ni Melchora.

"Mahibulong si mama kun nganong gabii kong molakaw? Dili ko gusto nga mahibaw siya kay basin ikaguol niya kini," ni Erica pa.

"Ingna lang nga nakakita na ka’g trabaho usa ka bakery nga abli 24 hours unya ang imong duty pang gabii," pagtudlo pa ni Melchora pagpamakak.

"Sige mamakak ko tungod ug alang nila," matud pa ni Erica  midugang sa pag-ingon, "unya kanus-a man ko nimo dad-on didto sa club? Kanus-a ko nimo ipa-ila-ila sa inyong manager?"

"Karong gabii dayon, unsay langanan ug ang imong ngalan sa club kay Erica di vah vonggacious?!" ni Melchor pa.

"Nadala na gyud nang ngalana nga perming itawag mo nako dah  nganong ganahan man gyud ka anang ngalana?" pangutana ni Erica.

"Dah, trip lang nako. Naay mopalag?" matud pa sa bayot mipahiyom na lang si Erica.

Alas sais sa gabii pa lang, nangandam na si Erica alang sa iyang pagpangaplay isip dancer sa club. Maoy pananghid niya sa iyang mama nga may trabaho na siya. Gi-recommend siya sa iyang amiga nga motrabaho sa usa ka bakery sa siyudad nga ang duty matag gabii. Samtang nangandam, nakapangutana si Erica  sa kaugalingon: madawat kaha siya sa maong club isip dancer? Unsa man kahay iyang kaugmaon sa maong trabaho? Mahatag kaha niya ang panginahanglanon sa pamilya pinaagi sa pagsulod sa pagka dancer sa club? Puta na ba siya nga matawag? (Sumpayan)