Nagpanglingi si Celso sa iyang kapikas nga si Nova sulod sa ilang sala nga duol ra kaayo sa ilang talad kan-anan, nagtan-aw sila'g Showtime sa ilang cable tv.
Tungod sa kaalimuot ning sayong kahapunon, wa sila magtupad og lingkod, (tagsa ra gyud sila magtupad kun magtan-aw sa tv).
"Alimuota oy!" ni Nova di lang kay kanapulo ni niya litoka samtang nagsige'g pamayopas sa paypay nga gama sa dahon sa buli. Maong nagsige'g panglingi si Celso niya, nabalaka ang bana kay bag-o lang nakagawas sa ospital ang asawa tungod sa mild stroke. Wa pay semana gikan sa paggawas. "Paandara ang ceiling fan", sugyot ni Celso. "Mahal ang kuryente!" pintok nga tubag ni Nova. Nimug-ot, nakapanglingo si Celso. Daghang higayon nga di sila magkasinabot kay managlahi ilang batasan.
"They have nothing in common" komentaryo sa uban nilang mga higala apan mosupak ang magtiayon kay nila pa, hilig sila'g musika, ganahan silang mag-videoke apan mao ra gyud na.
Si Celso nga usa ka CPA, matawag nga way libog, mahigalaon. Si Nova, instriktahon, reklamador labi na sa klima. Si Celso way reklamo sa klima, ganahan pang panington sa kaalimuot. Hapit kada-adlaw sila magkalalis. Labi na nga sila na lang duha sa balay nangaminyo na ilang duha ka anak nga lalaki. Naglain nag puyo, weekends na lang moduaw nila usahay. Trentay tres ka tuig na silang minyo. Way grabeng away. Wa gyud nagbuwag kay si Celso ang pasensiyoso. Wa lagi libog.
Sa ilang wedding anniversary party sa niaging Oktubre, gipangutana sila's ilang mga higala kun nganong wa gyud sila magbuwag si Celso. Si Nova ang nitubag: "Gugma, love conquers all." Ang gihigugma nimo sa kapikas, package na di lang ang kanindot hasta sab ang kalaksot" ni Celso. "Opposite attracts like magnet" timang ni Nova, nagpahiyom.
"Hain man ang mas mahal? Kuryente o ospital?" ni Celso. Napugos og tindog si Nova, gipindot sa bongbong ang switch sa ceiling fan. Nibalik og lingkod. "Sige kang daginot sa kuryente, unya atakehon ka's high blood tungod sa kaalimuot" ni Celso. Nipahiyom si Nova. Di siya makiglalis kun may punto iyang kapikas. (Kataposan)