Alas 3:00 sa hapon. Sa nurses’ station sulod sa Green Meadow Medical Center. Nagkalingaw og pakli sa mga charts sa pasyente si Sofia, usa ka nurse. Unya nakadungog siya’g awit gikan sa room 374 nga may bayente metros ang gilay-on. Awit sa lalaki nga mora’g tingog ni Josh Groban.
Daghang mga nurse ug doctor ang nakadungog sa tingog. Manglingi sila ngadto sa lawak inig agi sa koridor. Way duyog nga instrumento ang maong awit. Nahinumdum si Sofia nga ang pasyente sa maong lawak, tiguwang lalaki nga sitentahon na ang pangidaron.
Pagsulod ni Sofia, diha na si Dr. Allan Ambaque ug nurse nga si Lilian. Naghigda ang pasyente nga si Candido Palina, usa ka CPA ug mao gyud ang nagkanta. Nahinumdum si Sofia nga prostrate cancer ang sakit sa pasyente. “Do you need anything, Mr. Palina” ni Dr. Ambaque. “No, doc. You can ask my wife the reason why I’m singing” sa pasyente. Naputol iyang pagkanta. Apan nipadayon paghumag sulti. “Iya nang panaad, doc. Nga gusto siyang mamatay nga magkanta” ni Mrs. Palina, daw ginerbiyos.
“If I feel like I’m dying, I have to start singing. Because I want to show to my family and friends that I have a happy life” sa pasyente. “Do you need pain reliever?” ni Dr. Ambaque. “No, my pain reliever are my songs” sa pasyente.
Nibalik si Sofia sa nurses station. Karon pa siya kasugat og pasyente nga ingon ini. Napulo ka tuig na siya sa serbisyo. Sumala sa chart ang misis ray gipahibawo, duha ka bulan na lang ang tagal sa kinabuhi sa iyang bana. Nasayran sab ni Sofia nga si Mr. Palina usa ka pastor sa usa ka religious group nga puro boluntaryo ang mga miyembro. Way panguwarta. Kun may madawat silang mga donasyon nga salapi, ipamalit og tambal ug pagkaon. Iapod-apod sa mga kabos sa labing duol nga barangay. Gianugnan si Sofia sa maong pasyente. “Nagsigi na siya’g pasalamat sa Diyos kun bawion na iyang hinulamang kinabuhi. Kay igo na niya nga nakasinati siya’g kinabuhi. Bisa’g hamubo lang” ni Mrs. Palina sa ilang paghinabi.