Dul-an sa duha ka tuig nga nagpaabot si Lando, kang Sulidad, mahitungod sa gugma nga iyang gihalad apan hangtod karon wala pay tubag ang dalaga.
"Day Suling, kumosta na man kadtong gugma nga akong gihalad nimo may paglaom ba ako?," sukna ni Lando nga nitutok sa dalaga.
"Unya Lan, kung sugton tika unsa may imong ihatag nako," ni Sulidad nga nagpahiyom samtang nisimpid og diyutay sa ulitawo.
"Ihatag ko kanimo kining nagpitik kung kasingkasing," tubag ni Lando sa dalaga nga nigunit dayon sa mga kamot niini.
Human sa tam-is nga mga pasalig nakita ni Sulidad ang kamatinud-anon sa ulitawo busa iya kining gisaaran nga sugton atol gayod sa adlaw sa gugma o Valentine's Day.
Unya samtang nagpaabot sa maong adlaw nakahukom si Lando nga mouban sa iyang uyoan nga si Peryo aron pagpamutol sa mga punoan sa lubi nga himuon og lumber.
Usa ka adlaw niana samtang gilara ni Peryo ug Lando ang dakong punoan sa lubi kalit nga naipit sa kahoy ang blade sa dala nilang chainsaw busa nanukad si Peryo unya nihunat. Gibunlot niya'g kusog ang chainsaw apan nawagtangan siya sa balansi, kalit nga nabuhian ni Peryo ang chainsaw ug didto kini niigo sa dughan ni Lando.
Nalarab og maayong pagkatabas ang dughan ni Lando, nisugwak ang daghang dugo ug nilugwa ang iyang kasingkasing. Pagkabuntag niana mao na ang adlaw sa gugma, adlaw usab nga nasayran ni Sulidad ang nahitabo kang Lando didto sa hospital.
Kumosta kana Lan?", ni Sulidad nga nitulo ang mga luha sa tumang kaluoy.
"Ayaw paghilak day Suling ning akong pagpanaw ibilin ko kanimo kining pinitik sa akong kasingkasing, I love you," ni Lando nga nitunol sa iyang kamot ngadto sa dalaga. Mahal ko usab ikaw, Lan ug gidawat ko na ang imong gugma," tubag ni Sulidad nga nidawat usab sa kamot sa ulitawo.
Nipahiyom si Lando ug inanay nga gipiyong ang iyang mga mata, wala'y nahimo si Sulidad ug igo na lang kini sa pagpatulo sa iyang mga luha ning pagtaliwan sa iyang trato ning adlaw sa gugma. (Kataposan)