Tagay

“Nganong nangutana ka man, lin?” Pangutana sa ulitawo kang Lina.

“Naa man gud mi sabot ni Eser,” matud pa ni Lina.

“Sabot? Unsa nga sabot?” Laing pangutana sa ulitawo.

“Nga ma quits ang akong utang niya kun dunay mahitabo ninyo,” matud pa ni Lina.

“Mora diay ko’g imong gibaligya anang kalakiha Lin.” Pagpanghupaw ni Carlo nga wala gihapon sa mood. “Basta mao toy among sabot ... unsa man, dunay nahitabo ninyo adtong gabhiona?” Pagsubli’g pangutana ni Lina sa ulitawo.

“Oo, makaduha ka higayon, pero giluod ko dalang pagmahay. Pero wala na koy mahimo. Nahitabo na to, dili na ko gustong hunahunaon tong nahitabo namo ni Eser,” matud pa sa ulitawo.

“Dah daan pa ko. Gipaningil pa ko sa bayot buang. Bakako’ng dako, matud niya nga wala konoy nahitabo ninyo kay mibalibad kuno ka. Mipauli kuno ka nga wala gani mananghid niya.” Matud pa sa dalaga.

“Nah, ayaw nana’g hisgoti oy. Humana to,” matud pa sa ulitawo.

“Magkita gani mi, duklon gyud to nakong bayota,” matud pa ni Lina, nanghupaw na lang si Carlo. Nakabantay niini si Lina nga morag subo ang panagway sa gikaestorya. Milakaw na unta si Carlo, apan gipugngan ni Lina.

“Kadiyot una Carlo,” pagpugong sa babaye kang Carlo.

“Ngano, Lin?” Pulong ni Carlo. “Ngano  man ka? Mora lagi ka’g magul-anon? Yuna, naa na kuno ang imong mama gikan abroad?” matud pa ni Lina. Nanghupaw una si Carlo ug gitubag ang babaye.

“Oo , Lin.” Mubong tubag sa lalaki,

“Kun mao, baga’ diay’g bulsa ron ang imong papa?” Matud pa ni Lina nga gisabayan og ngisi.

“Di ta maghisgot ana Lin bi.” Paglikay ni Carlo sa maong topic.

“Asa man diay ka paingon?” Laing pangutana sa dalaga.

“Ngita’g tagay.” Mubong tubag sa lalaki.

“Nganong mangita ka pa man og katagay? Di lang ka mo-invite nako? Unsa man, one on one ta?” paghagit ni Lina og tagay sa ulitawo. Busa way langan, nangita sila og tindahan nga ma-imnan.

Dihang nakahurot na og duha ka grande nga beer ang duruha, medyo nakulangan pa si Carlo. Gipun-an pa kini og laing botelya, hangtud nga gi-asoy ni Carlo sa babaye ang nakapalibog ug iyang gikagul-an hangtud ang panagbuwag sa iyang mga ginikanan.  Hapon na dihang nahuman sila’g inom, medyo hubog na sab si Carlo, apan si Lina, morag wala lang maigo sa giinom, nagpasabot nga hanas na ang babaye sa pag-inom og mga ilimnong makahubog.

“Pauli na ko Lin, morag hubog na ko dah.” Medyo nagsuwapid na ang dila sa lalaki.

“Dali, kuyogan tika sa inyo.” Pagbulontaryo sa babaye.

“Ayaw na, naa si papa sa balay,” Matud pa sa lalaki.

“Ngano man diay og naa? Dili ko mahadlok,” Matud pa sa babaye.

“Ako na lang lagi.” Dayon mibarog ang lalaki Ug mitikang, apan nasarasay kini, daling nasawo ni Lina ang lalaki, ug didto nahipunta sa dughan sa babaye ang nawong ni Carlo.  Mingisi ang lalaki nga mihangad  sa babaye.

“Mingaw nako  ana Lina dah.” Pilyong pulong ni Carlo kang Lina.

“Dali, dili ta mamauli sa inyo. I-take home tika kay wala sila si mama ug papa sa amo,” Matud pa sa babaye.

“Unsay pagtoo mo nako Lin, pagkaon nga i-take home?” Mingisi ang lalaki ug mikidhat sa babaye. (sumpayan)