Nagkarakara si Nito sa pag-adto sa tiyanggihan sa ilang baryo ning buntaga. Namasin siya nga adunay tabugok nga tinda ang mga lab-asera. Nangala man gud og tabugok ang iyang asawa. Nalipay si Nito kay mao kini ang umaabot nilang unang liwat. Sayo ganihang buntag, nagtimitimi sa pagkaon si Mily sa napalit niyang isdang til-ugon---dakong isda sa bato nga iyang gisugba, nga sayong gisuroy sa mananagat nilang silingan.
“Gusto ko’g tabugok sa pamahaw, Nit...!”
“H-ha? Tabugok? Sige, mobalik ko’s baybayon, tingali’g adunay mananagat nga modunggo nga nakakuha og tabugok! Kun dili, modiritso ko’s atong tiyanggihan ning buntaga...!” pasalig ni Nito ngadto kang Mily.
Naminghoy si Nito sa pag-adto niya sa baybayon. Wa gyuy nakuha nga tabugok ang mga mananagat sa ilang baryo nga sila’s Rael, Ernie, Pons, Romy ug Rene. Mao nga nidiritso dayon si Nito sa tiyanggihan. Apan wala gihapoy tabugok nga gitinda sa mga lab-asera. Luya ang mga lakang ni Nito nga mipauli sa ilang balay. Sa iyang paghiabot, maoy pagkahuman og kaligo ni Mily. Nakailis na ang iyang asawa sa iyang daster.
“Wa gyuy tabugok nga nakuha ang mga mananagat sa atong baryo Mil, uy! Sa tiyanggihan, wa say naninda og tabugok sa mga lab-asera!
Nagtupad og lingkod sila si Nito ug Mily sa lantay’ng kawayan nga gihimo nilang sopa sa hawanan sa ilang balay.
“Aw, ayaw na lang gyud paghasol sa pagpangita og tabugok, Nit!”
“Nabalaka ko, Mil! Nangala ra ba ka...!”
“Pulihi lang gud og laing tabugok, Nit...!” paraygon kaayo si Mily nga mikihat kang Nito. Misamot kapresko ang iyang pamayhon nga bag-ong nakaligo ning buntaga.
“H-ha? Unsay buot mong ipasabot, Mil...?”
“Wa kay salig sa imong tabugok, Nit....?” ni Mily nga makahuluganon kaayong mibitad sa kamot ni Nito paingon sa sulod sa ilang kuwarto. (Kataposan)