Komosyon sa siyudad

“Kun gusto kang magpakamatay ayaw pangamong du!” Maisogon nga pulong sa driver sa taxi. Daling mipaingon si Carlo sa nahimutangan sa driver.

“Unsa to?!” Maisogon usab nga pulong ni Carlo.

“Kun magpakamatay ka, layat sa building, i-una ang imong ulo. Ayaw pangamong namong mga driver,” matud pa sa driver. Tungod kay nagsipok ang ulo ni Carlo, dali kaayong nakakuot ang lalaki sa driver sa nahimutangan niini. Gikwelyohan ug nagawas ang lawas sa driver kutob sa dughan ug medyo napiit pa. “Ikaw pay hapit makasala, ikaw pay isog kaayo.” Matud pa ni Carlo, dayong busdak sa driver nga napakong intawon ug nagping-it sa kasakit.

“Aray!. Wala ka man magtan-aw sa imong gilaktan. Go pa para sa sakyanan. Pero milabang ka nga green signal pa ug...”wala makatiwas ang driver sa buot niining isulti kay dali kaayong nakatugpa ang kumo ni Carlo sa apapangig sa driver. Daling giablihan ni Carlo ang pultahan nga dapit sa driver ug gikwelyuhan na usab kini, gipagawas sa sakyanan. Laing pagtugpa na sab sa kumo ni Carlo ngadto sa nawong sa driver ug nasarasay kini ug natumba. Way bawot ang driver kay mubo kini, dili hinoon daut pero sa kusog ni Carlo wala’y ikasarang ang maong driver. Naligdas kini sa dalan. Giyatak-yatakan pa ni Carlo. Gipahungaw ang tanang kalagot. Ang driver ang napahimungtan sa tanan niyang kasagmuyo, kalagot ug uban pa. Wala intawon makasukol ang driver. Gumikan sa komosyon, nanagtapok na ang mga tawo sa dapit, mga standby, mga barker, sagol-sagol nga mga two. May nag-ingon pa nga tingog sa babaye, “uwanga na ninyo oy.” Aduna pay nag-ingon ug misyagit, “pagtawag mo’g pulis!” Ug adunay laing singgit nga mabati. May nag-ingon usab nga, ‘pasagdi-i na. Nindot ning esenaha, live!’ dayong katawa sa uban. Nagka-anam og kadaghan ang mga tawo nga gustong manguryuso, samtang misugod na sab ka traffic, mga busina ang mabati. Misamot kagahob ang palibot. Ug sa kalit lang may nabati nga serena sa pulis, may pito usab sa nga nadungog. Misamot kasaba ang siyudad tungod sa maong panghitabo. Dili mahunong si Carlo s a pagkulata sa maong driver kun wala pay pulis nga mipahunong sa gibuhat sa ulitawo. Makita usab ang driver nga mikulo sa kasakit nga naa sa aspaltadong dalan. Walay nahimo ang ulitawo, gawas nga mohunong sa iyang pagsige’g kulata sa driver. Nagkadugo ang baba sa driver, nagisi ang kilay niini.

“Dali sa presinto. Kamong duha. Nagdala lang mo’g traffic dinhi da. Tana sa presinto.,” mando sa pulis. Gikuptan sa duha ka pulis ang masig ka bukton ni Carlo. Way nahimo kay pulis na man ang naggunit niya. Didto sa presinto, nag-atbang si Carlo  ug ang driver diin ang nawong intawon  sa pobreng taxi driver wala mahitsura, natuto ang baba, nagsige’g tulo ang dugo gikan sa samad sa kilay. Nagsugod pagpanglagom ang dagway agi sa pagkulata. Daghan ang gipangutana sa pulis ngadto kang Carlo, apan way tubag-tubag si Carlo. Samtang ang driver, miasoy sa nahitabo. Gikonpirmar sa pulis ngadto kang Carlo ang giasoy sa driver, apan wala gihapon motubag si Carlo. Way bisan usang pulong ang migawas sa baba ni Carlo. Misugyot ang pulis nga pasakaan og kaso si Carlo aron motagam. Mitando lang ang driver.  Busa, gisulod una sa prisohan ang ulitawo. Way daghang estorya ug way pagbabag o paglugnot, misulod lang sab si Carlo.

Usa  ka oras kapin ang milabay, miabot ang amahan ni Carlo, si Arturo, nagsul-ob pa og uniform sa security guard sa armoured van. Kuyog niini si Pikot nga usa sa iyang mga barkada ug classmates. Naabtan pa ni Arturo ang driver. Gihangyo ang driver ni Arturo nga makig-estorya. Iya lang unang adtuon ang anak sa nahimutangan niini. Unang miadto si Pikot kang Carlo. “Unsa man ning hitaboa part? Nganong gikulata man nimo ang driver? Naa baya imong papa, akong giadto sa iyang trabahoan pagkasayud nako sa nahitabo kay duna man tay usa ka classmate nga nakakita s a imong pagpangulata anang driver sa taxi,” Matud pa ni Pikot. Miduko lang si Carlo, nanghupaw. Unya may tunob nga nagpaingon sa nahimutangan, pagyanghag ni Carlo ang iyang amahan maoy nakita, ingon og nagpangagot ang ngipon, mabasa sa dagway sa amahan nga nasuko kini kaniya. “Mapriso kang animala ka sa imong gibuhat,” matud pa sa amahan. (Sumpayan)