Hi Medyo Maldito! Ako si Angel, 24 years old. Naa koy uyab pero nagbuwag mi four months ago. Actually, di gyud ko kaingon nga nagbuwag mi kay wa man gud mi closure. Nikalit lang siya og ka wala. Wa na nagparamdam. Nahibaw-an na lang nako nga naa na diay siya'y bag-o. Nagsige ra gyud ko'g hilak tungod niya. Nasakitan gyud ko kay wa man lang siya nakigbuwag nako og tarong. Ang akong problema karon kay di gyud ko ka move on niya. Murag naghuwat ra gihapon ko nga magparamdam siya balik.
Mugamit ko'g lahi nga number aron moreply siya sa akong mga text. Bisa'g unsaon nako'g hangyo,wala. Di gyud siya makigstorya nako. Bisa'g tubagon lang unta ko niya akong pangutana nganong gibiyaan ko niya, wa gyud. Nganong lisod man kaayo mag move on?
Angel
* * *
Hello Angel!
Naglisod ka'g move on kay siguro, di man ka ganahan. Di ka ganahan mo let go. Di gyud ka ka move on kung di nimo gusto. Di ka ka move on kung magsige pa ka'g huwat sa iyang text, chat, ug tawag.
Gipasakitan ug gibinuangan na gani ka, maghuwat ra gihapon ka niya? Nganong magsige pa man ka'g kupot nga dugay na man ka niya'ng gibuhian? Kung naay loyalty award ang pagkatanga sa gugma, imoha na gyud ang medalya. Magsige ka'g apas niya, sige'g hangyo nga balikon to ninyong sa una. Angel, remind lang tika ha? Ang mubalik, katong namiya. Dili ang gibiyaan.
Di pud tika mabasol nganong naghuwat pa ka nga mubalik siya. Galisod ka'g move on kay kalit ra man siya'g kawala. Way pananghid, murag iro. Maayo pa ang salida, moingon pa og THE END. Makahibaw ka nga human na. Di pareha ato niya nga kalit lang og kawagtang. Pero ayaw na sige'g pangutana og NGANO. Di gyud na makatabang nimo.
Kung humana, humana. Ayaw na paghuwat sa iyang tubag -- sa iyang mga palusot ug bakak. Pangita na lang og pamaagi nga matabangan nimo imong kaugalingon. Ayaw sige'g maoy ug sige'g hilak kay makabati na og dagway. Ipakita niya nga okay ra ka ug kung unsa ka nindot imong kinabuhi nga wala na siya. Muabot ra ang panahon nga maka move-on na ka niya ug kataw-an na lang nimo imong kaugalingon. Magkatawa ka maghunahuna nganong naglisod ka'g move on niya.
Medyo Maldito
* * *
Alang sa inyong mga problema nga buot ninyong tambagan ni Rowell Ucat, suwata ug ipadala sa: medyomaldito@gmail.com