Wa’y respeto sa balaod

Mangangagaw og yuta! Mangangagaw og yuta!  nilanog ang tingog sa usa ka lalaki sulod sa diskohan sa Barangay Gumal nga nagsaulog sa piyesta karong gabhiona.

Nadungog ni Merto kay nihunong og kadiyot ang tukar sa sound system ning sayo nga kagabhion. Nisanting ang iyang dunggan, labi na nga nakainom-inom na siya. May kuyog si Merto nga duha ka bisita nga sila si Arman ug Nestor, mga kauban niya sa trabaho sa construction firm nga ilang gialagaran.

“Ikaw man gyu’y gipadungogdungog arong tawhana kay nakahisgot man ka’s inyong kaso sa yuta,” ni Arman ngadto ni Merto. “Birahan ta na!” matud ni Nestor. “Tana!” nadasig sab si Merto.

Giadto nila ang tawo nga nagsinggit sa pikas daplin sa diskohan. Natataw ni Merto nga si Gary ang nagsinggit, anak ni Almira nga igsuon sa gikiha niya nga tulo ka magsoon, sila si Merto, Karen ug Edmund. May tulo ka tawo nga niduol ni Gary, iyang mga kauban ug andam makigbahogbahog.

Sa distansiya nga tulo ka dupa sa atubangan ni Gary, niurong si Merto. “Kinsa ang mangangagaw nato? Ang yuta napalit sa among amahan, inyong gitukura’g mga balay. Wa’y pananghid. Wa mo’y papeles nga ikapakita nga kamo ang tag-iya sa yuta. Wa gani mo nagbayad og buhis!” ni Merto nga nagtulisok ni Gary.

Nagbaga ang mga mata sa kalagot. Nipadaplin ang kadaghanan sa mga tawo. Nakasabot nga may rumble nga mahitabo.

Milanog ang tingog sa kapitan sa barangay. “Merto! Gary! Ang barangay kapitan ni! Lingawlingaw ang atong tuyo dinhi sa diskohan sa pagsaulog nato sa tinuig nga pangilin, dili away!. Ang inyong kaso naa na sa husgado. Ebidensiya ang inyong pakombatehon. Ang pildehonon maoy mangita’g gubot!” matud sa sipa nga tingog sa sound system.

“Husto, bay! Di lang ta mangita’g gubot. Balik ta sa atong puwesto,” agni ni Merto sa duha niya ka kuyog. Nalingian niya si Gary nga nipaatras sab sa iyang mga kauban.

“Salamat sa inyong pagpaminaw! Music maestro!” sa kapitan. Ug nibalik ang linagubo sa disco music gikan sa sound system inubanan sa mabulokon nga mga dancing lights. Daghang nagparisay nga nagsugod og sayaw sa tungatunga sa diskohan.

Gipaningot si Merto, daw nahuwasan. “Mamili ta og kapares aron pasingot ta’g sayaw,” agni niya sa mga bisita. Nakaamgo si Merto nga dili angay tubayan ang tawo nga way respeto sa balaod. (Katapusan)