Paiponon sa boyfriend

Dear Tita Salie,

Hi! Just call me Pamela, 17 years old. Taga Bukidnon ko pero ania ko’s Cebu karon nag-work. Duna ko’y boyfriend karon nga mi-offer nga magtipon na lang kuno mi sa iyang boarding house aron maka-save ko sa galastohan. Maayo kaha nga ako siya nga tumanan? Pasabta ko.

* * *

Dear Pamela,

Maayo man ang inyong plano nga mag-save sa galastohan ilabi na gayud kun naa mo sa siyudad nagtrabaho.

Pero ang pag-ipon sa imong boyfriend sa iyang boarding house naghatag kanimo og risgo, labi na gayud kay babaye ka. Dili man gud maayo sa usa ka babaye nga moipon og boarding house sa lalaki gawas kun sila magtiayon na.

Kay ang Bibliya nagpasidaan sa rekord sa Hebreohanon 13:4 nga nag-ingon: “Himoa nga dungganon ang inyong kaminyoon.”

Busa samtang uyab pa kamo, ayaw gayud pagsugot nga mag-ipon mo og boarding house aron sa paglikay sa peligro nga wala pa mahitabo kanimo.

Gamita ang maalamon nimo nga desisyon aron dili ka magmahay sa kaulahian. - Tita Salie