Nawong daghang bugas-bugas

Dear Tita Salie,

Have a nice day. Tagoa lang ko sa ngalan nga Adin, 15 years old. Ang problema nako bahin kini sa akong panagway. Ingnon man gud ko sa uban nako nga classmate nga dili ko angayan kay daghang bugas-bugas ang akong nawong. Unsa man ang angay ko nga buhaton Tita Salie? Pasabta ko. Thank you.

* * *

Dear Adin,

Dili kana kalikayan ilabi na nga tin-edyer ka pa. Daku kaayo ang posibilidad nga ang imong nasinati nga bugas-bugas sa nawong dili kana dumalayon.

Ang imong nasinati karon nga problema, mohupas ra kana paglabay sa pila ka katuigan samtang nagatubo ka paingon sa pagkahamtong.

Dili ka angay’ng mabalaka kay adunay tambal nga imong mapalit para sa bugas-bugas sa nawong. Busa sulayi ang paghupot og positibo, malipayong espiritu. Buhata ang kutob sa imong mahimo alang sa pagtambal sa imong bugas-bugas karon dayon. -- Tita Salie