Night market

Gula 5

Sanglit adlaw man nga Biyernes, dili kaayo daghan ang mga nanuroy sa Plaza Independencia. Alang kang Cesar, tukma kini nga higayon alang kanila ni Alma.

“Nindot man diay suroyan dinhi sa gabii no?” matud ni Alma nga ingon sa nalipay kaayo sa ilang pagpanuroy. “Bitaw, sagad mga maghigugmaay ang manuroy dinhi,” ni Cesar.

Gipasiklapan ni Cesar si Alma samtang mura’g inihap ang ilang mga lakang nga nagpaingon sa lingkoranan nga semento ilawom punoan sa dako’ng kahoy. Gituyo ni Cesar nga didto sila milingkod sa lingkoranan nga nag-atubang sa Fort San Pedro aron kini maoy makapadugang sa kaanindot sa talan-awon.

Bugnaw kaayo ang hangin nga misapigad sa ilang kalawasan nga gikan sa dagat.  “Kabugnaw uy,” matud ni Alma. Gihukas ni Cesar ang iyang jacket ug gikupo kini kang Alma.

“Hala, pagka caring nimo nako Sar uy, ma in-love man ‘sab ta,” dala’ng komedya ni Alma. Gisakyan dayon ni Cesar ang gisulti ni Alma.

“Malipay g’yud kaayo ko Alma kun matinuod nga ma in-love ka nako,” matud ni Cesar. Anam-anam nga giagbayan ni Cesar ang abaga ni Alma.

Gipasagdan ra usab sa dalaga si Cesar nga miagbay kaniya. Gipadailos ni Cesar ang iyang tuo nga bukton ug didto kini miangkla sa hawakan sa dalaga. Dili matukib sa pulong ang kalipay nga gibati ni Cesar nga nagakus na niya ang babaye nga nakat-onan na niya sa pagmahal. (Sumpayan)