Gula 6
Gubot kaayo ang akong hunahuna. Dili ko makaharong pagtan-aw sa akong mga ginikanan ug ni kuya Cain.
Mitindog ko gikan sa akong gilingkoran ug gibiyaan sila nga nagpadayon pa sa pagpangaon. Misulod ko sa akong kuwarto. Mihigda sa lantay ug gibukotan ang kaugalingon sa habol.
Apan wala madugay nahisulod si nanay Ludy sa akong kuwarto. Iya diay ko nga gisundan. Nahibulong tingali siya sa gipakita ko nga mga lihok sa among pagpangaon.
“May problema ba, anak?” sukit ni nanay Ludy diha nga nakalingkod na siya sa ngilit sa lantay nga akong gihigdaan.
“W-wa man, Nay,” mubo ko’ng tubag.
“Unya, diyotay ra man lagi ang imong gikaon?” ni nanay pa.
“Lain man gud ang pamatyag ko sa akong lawas, pero mawagtang ra ni kun makapahuway na ko,” matud nako.
Wala motingog si nanay Ludy. Iyang gitapin-an ang akong buko-buko sa iyang palad ug ang akong agtang. Nabasa nako ang kahingawa nga milabhag sa iyang nawong. “Wala ka may hilanat, Darlene,” niya pa. (Sumpayan)