Edot mangingilad

Namatay gayud ang kabaw nila ni Pedring nga napaakan og mala nga mananap. Gikaguol kini pag-ayo ni Linda kay usahay ang kabaw hulaman kadto sa iyang bana nga si Edot.

“Hoy! Edot asa man tawon ka nga nagdala ka man og bara de kabra ug sako,” ni Linda. “Psst, ayaw pagbanha, madunggan ta’s mga silingan. Kawton nako kabaw ni pare Pedring aron makakuwarta ta. Tan-aw lang ayaw og banha?” ni Edot.

Nakawot g’yud ni Edot ang gilubong nga kabaw. Iyang gikarne. “Ari namo Dong ug mga Inday, Noy ug mga manang, humok kaayo ang karne sa kabaw,” ni Edot nga nagpanawag sa mamalitay.

Nagkapuliki si Edot sa kadaghang namalit. May nakabantay nga mura’g baho na ang karne.

“Ayaw, kabalaka ana Dong, ana man g’yud na’ng kabaw, mawala ra na, imo nang butangan og ahos dayon imarinet, dayon adoboha, daug na?” ni Edot nga nagkatawa sa hilom.

Malipayon si Edot nga nagpaypay sa iyang halin. Nahaigking si Edot kay kalit nga miabot si Linda gikan sa merkado “Uy! diin man na nimo?” ni Linda nga nahibulong. “Aw! may lain pa, halin sa kabaw. Naunsa baya ka, imo ni o. Usa ka libo na ha?” ni Edot pa. “Diin man sad nimo gibaligya?”

“Sa pikas baryo, bright gud ni,” ni Edot nga nagngisi.

Pagka-kaadlawon, na tingala si Linda nga may mga balde ug kontiner nga puno sa tubig. “Edot unsa na man pud ang nahuna-hunaan nimo do?” ni Linda nga nagpanglingo-lingo.

“Ayaw og saba, naghimo ko’g tuba Lin? ni Edot nga pinahagawhaw ang tingog. “Unsay tuba? Naa kay kalubihan?” ni Linda pa.

“Nagpalit ko’g tungog ug chemical, maghimo ko’g tuba,” ni Edot pa.

Pagkabuntag nagbutang na’g karatola si Edot “tuba for sale, pure tuba gikan sa probinsiya.” Gihugopan dayon ang tuba ni Edot. “Noy...Edot usa ka galon ako kay para ni lolo ug lola,” ni Lydia nga nagpakigol.

Nahurot ang tuba ni Edot. Pwerteng lipaya sa karaho. Sayo’ng ni mata si Edot apan dako niya nga katingala kay nagpanon ang mga tawo nga nagdala og mga bunal paingon sa ilang balay.

“Edot gawas diha! Mangingilad ka! Akong lola ug lolo nanglawom na ang mata! Nagkalibang, nag-igit raba g’yud?’ sa tawo nga pwerteng isoga.

Gitabangan og bunal si Edot sa mga tawo ug didto nagsugod na’g basa ang purol ni Edot. Nakaihi sa kasakit. (Katapusan)