Huyhoy ang abaga ni Junnel nga migawas sa opisina ni Congressman Aryl. Napakyas man gud ang iyang tuyo sa pagpangayo og panabang aron maoperahan unta ang iyang anak nga naaksidente ug na-admit sa ospital.
Nadasmagan og sakyanan ang bata samtang namasura kini aron adunay mapangkuwartahan. Wala ra ba gayud mailhi ang nagmaneho sa sakyanan nga nakadasmag.
Samtang nagbarug siya daplin sa karsada, nagsige’g hunahuna si Junnel kun asa siya mangayo og tabang aron maoperahan na ang iyang anak?
Pulos mibalibad ang iyang gipangayoan ug lainlain ra ang rason sa mga tawo nga giduol ni Junnel. Kini maoy nagtukmod kang Junnel nga moadto sa balay sa kongresista, apan mibalibad gihapon.
Gitambagan ra siya nga modangop sa opisina sa DSWD. Hapit na lang mohilak si Junnel kay mopasunding man dayon sa iyang pangisip ang larawan sa iyang anak nga nag-antos sa kalisod sulod sa emergency room.
Wala gani bisan usa ka kadugo nga nagtanod sa bata didto sa ospital. Iya ra nga gibilin sa usa ka tawo nga nagtanod usab og pasyente.
Dili man ‘sab mahimo nga mopuli kaniya ang iyang asawa kay bag-uhay pa lang kini nga nanganak.
Samtang nagsige’g hunahuna si Junnel, wala lang tuyoa nga nakasigpat siya’g babaye nga bag-ohay lang migawas sa usa ka bangko. Sa hunahuna ni Junnel, nag-withdraw gayud kini’g kuwarta kay puwerte man nga nakasipit niini sa iyang bag.
Kalit lang nasudlan og demonyo ang utok ni Junnel. Gikalit niya’g sakmit ang bag nga gisipitan sa babaye, dayon nga sutoy og dagan palayo sa maong dapit.
Misuot si Junnel sa baga’ng duot sa katawhan samtang ang babaye nagkapagaw nga nagsinggit og pakitabang. Diha nga miliko na unta si Junnel sa usa ka eskina, nakasugat siya’g patrol car. Mobalik unta si Junnel sa iyang agi, apan ulahi na. Napugos sa paghunong si Junnel nga bitbit gihapon niya ang bag. Diha nga dakpon na unta si Junnel sa mga polis, dali siya nga nakaipsot.
Misutoy unta siya sa pagdagan, aron paglikay sa buot untang modakop kaniya. Gisalbahan na usab si Junnel sa usa ka pulis, ug giingnan nga pahunungon. Gigukod siya sa mga polis hangtud naapsan.
Kay dili lagi gusto si Junnel nga magpadakop, gikalit niya og itsa ang bag ngadto sa nanaggukod kaniya ug mipadayon siya sa pagdagan.
Giabot og demalas si Junnel kay sa tanto niyang likay sa mga polis, nadasmagan hinuon siya og jeep. Nagkaligiray si Junnel sa sementadong karsada ug kalit lang nawad-an sa panimuot. (Kataposan)