Gula 98
Diha nga itampok na unta sa pangulo sa mga Bangkulisan ang punyal ngadto sa dughan sa anak ni SPO1 Nicko Bernal nga naghayang nga ginapos ibabaw sa halaran, kalit may granada nga mibuto taliwala sa nagtapok nga mga Bangkulisan.
Nagkagubot ang mga sakop sa kulto. May namatay diha-diha dayon ug may naangol. Mimando ang pangulo sa kulto sa paggamit sa ilang mga armas.
Sila diay si PO3 Roy Cañares, PO1 Rudy Alarcon ug PO1 Reuben Lebra ang nahiabot kuyog ang pipila ka polis. Gibadbaran nila sa gapos sila si SPO1 Nicko Bernal ug ang asawa niini nga si Gelli. “Giunsa ninyo pagtultol dinhing dapita?” gipangutana ni Nicko si Roy.
“Duol na mi sa kuwerpo sa diha nga may nabati kami nga buto-buto, Sir. Nagdali kami. Pero maoy among nakita nga gisirkulohan ka na sa daghang mga polis nga sakop na diay sa kulto nga gipangulohan sa atong hepe.
“Maong nakita namo nga wala g’yud kami dag-anan kun makigsangka kami kanila niadto’ng tungora. Mitago na lang kami ug hilom sila namo nga gisundan kun asa ka nila dad-a.”
“Nicko. Ang atong anak. Luwasa siya,” ni Gelli. May polis nga mitunol dayon sa iyang armas ngadto kang Nicko. Dihadiha milihok dayon si Nicko aron pagluwas kang Barbie. (Sumpayan)