Naamiga sa FB - Gula 13

Wala’y nahimo si Ramon kay nasabot niya kun unsay gusto ni Kenn nga mahitabo tali kanila. Ingon sa gitukmod si Ramon sa grabe’ng kalalim nga iyang gibati niining tungora mao nga gipaundayonan na lang niya si Kenn.

Mikilab lang ang mga gutlo ug takulahaw lang nga nag-akob na ang mga ngabil nila ni Kenn ug Ramon. Misamot ang kainit sa kalawasan nga gibati ni Ramon nga iya lang gipugngan sukad pa sa pagsugod niya’g masahe sa dalaga.

Nagbutok-butok ang kasing-kasing ni Ramon sa tumang kahinam ug nakaalinggat siya nga misamot sa pagtuyhakaw ang usa ka parte sa iyang lawas samtang padayon niya nga giparaygan si Kenn.

Gibuhong niya ang iyang kaugalingon sa pagparayeg kang Kenn nga mipaundayon lang usab sa iyang gihimo. Hangtud nga nakabantay siya nga mialayon na si Kenn sa pagpakigparayganay kaniya.

Paspas kaayo ang pagkilab sa mga takna ug hingpit na gayud nga giangkon ni Ramon ang maanyag nga dalaga.

Gisaw-an nila ug gisubli-subli ang pagdimdim sa dugamis sa gugma.

“Maayo ka man diay kaayo nga mokumbati Mon. Gihangos ko’g maayo nga mura’g nagdagan og pipila ka kilometro,” matud ni Kenn nga migakus kang Ramon. Igo lang mipahiyom ang ulitawo.

Kun gihangos man si Kenn, mas labaw na si Ramon nga hilabihan ka paspas sa iyang mga lihok nga ingon sa mahadlok nga mailogan sa iyang kalipay.

“Ayaw kabalaka Kenn, kun mosugot ka, andam ako nga mahimo nimong kapikas sa kinabuhi,” matud ni Ramon. Gigakus ni Kenn si Ramon sa tumang kalipay. (Kataposan)