Bugti sa kasilag

Ma, nakasulod na ko’g trabaho, ni Ancing pa ngadto sa iyang inahan nga si Mercedita. “Wa’ g’yud ko magtuo, Ma nga makapasar ko sa interview kay  daghan kaayo mi ug pulos mga bright ang nangaplay!.”

“Ay, salamat, Dios ko, nga gidungog g’yud ang akong pag-ampo nga makatrabaho ka. Buotan g’yud ang Ginoo, anak,” ni Mercedita ngadto sa iyang anak dalaga.

Guwapa si Ancing ug intelehente. Migraduwar siya sa iyang kurso nga Cum Laude. Pero, luoy lang kaayo si Ancing, kay wa’y matawag nga amahan.

Gipaangkan si mama niya Mercedita ug siya ang bunga sa pagminahalay sa iyang amahan ug sa iyang inahan. Ang gikasakitan ni Mercedita kay si Samuel nagminyo og laing babaye.

Tungod niini, nanumpa siya nga kasilagan niya si Samuel sa tibuok niya nga kinabuhi. Pakatawhon niya ang iyang gisabak ug kun modako na kini, tudloan usab niya nga masilag sa iyang amahan.

“Ugma, Ma, pasugdon na ko sa akong trabaho. Naa ko sa Accounting Department ma-assign. Abi nimo, Ma, buotan lagi ang among Boss nga mao ‘sab ang tag-iya sa kompaniya nga akong giaplayan,” ni Ancing.

“Kinsa ang pangalan sa inyong Boss, Ancing?” ni Mercedita nga nagpakisayod.

“Samuel... Samuel Magdangal,” mubo nga tubag ni Ancing. Human og sulti ni Ancing sa pangalan sa ilang Boss nga mao ‘sab ang tag-iya sa kompaniya, kalit lang mimugtok ang nawong sa inahan.

“O, Ma, ngano nga ingon sa nasubo man ang imong nawong, wala ka malipay nga nakasulod na ko’g trabaho?” sa dalaga pa.

“Ancing, anak, gikasilagan ko kanang tawhana kay mao na siya ang naglimbong sa akong pagka babaye. Iya lang ko nga gipahimuslan ug pagkahuman gibiyaan. Kanang tawhana.... kana si Samuel Magdangal mao ang imong amahan...” midiyong ang nawong ni Mercedita.

“Busa, samtang wala ka pa makasugod sa imong trabaho, ayaw na pag-adto didto, pangaplay na lang og lain...” sa inahan.

“Apan, Ma, anugon ang opurtunidad,” ni Ancing nga mirason. Wala motingog ang inahan nga mibiya. Luhaan ang mga mata. Usa ka hapon may nangayo’g katahoran sa tugkaran. Ug dihang gidungaw ni Mercedita sa bentana maoy iyang nakita si Samuel.

Midayon kini bisa’g wala padayona. Ug may gipahayag, nagbasol. “Mercedita, pasayloa ko. Mao nga nahitabo kadto kay miadto ko sa laing nasud aron pagtuon og matang sa negosyo. Karon nga milampos ko, nia akong gipasulod ang atong anak kay mahal ko siya ug mahal ko usab ikaw. Dugay na nga namatay ang akong asawa. Mercedita, ayaw na pagbaton og kasilag kanako...” (Katapusan)

Show comments