Dear Tita Salie,
Tagoa lang ko sa ngalan nga Vincent, 29, public high school teacher. Ang akong suliran mahitungod sa akong mga co-teachers nga grabe manungog mura’g bugalbugal para nako. Sagol insult na ang ilang komedya. Dili na ko ganahan mosulod sa among faculty room kay sugaton ko’g sungog. Seryoso ko nga pagkatawo ug sa trabaho. Pasabta ko kun unsaon ni nako pag-deal?
* * *
Dear Vincent,
Dili g’yud ikahibulong nga sa atong panahon karon duna g’yuy mga tawo nga wala’y gugma sa isigkaingon, mabugalbugalon. Palabya lang usa ang problema ug sunda ang tambag sa Salmo 4:4 nga nagaingon: “Mapikal kamo apan ayaw pagpakasala. Makigsulti kamo sa inyong kasingkasing diha sa inyong higdaanan, ug maghilom kamo.” Kun sa imong tan-aw dili maayo nga basta na lang kalimtan ang ilang gibuhat, mas maayo nga moduol ka nila. Apan ayaw pakig-estorya nila nga anaa ka sa kasuko.
Ang Proverbio 15:18 nag-ingon: “Ang usa ka masuk-anong tawo nagasugnib sa panaglalis, apan siya nga mahinay sa kasuko nagapalinaw sa panag-away.” Hinumdomi nga miduol ka dili aron pagpanimalos, kondili aron mahusay ang problema ug aron kamo magkauli. – Tita Salie