Gula 11
Nag-agulo si Kenn sa matag hapyod ni Ramon sa iyang buko-buko. Nabatyagan usab ni Ramon nga mura’g adunay pino nga butang nga mangapusa didto ilawom sa lawas ni Kenn nga iyang mahapyod.
Gusto ni Ramon nga mahuwasan sa hingpit si Kenn pinaagi sa iyang pagmasahe. Nahinumdom si Ramon sa gisulti sa iyang inahan kaniadto nga ang hilanat makuha ra dayon pinaagi sa pagmasahe.
Diha nga nahuman na og masahe ni Ramon ang buko-buko ni Kenn, gihaplasan na usab niya ang paa ug bitiis sa dalaga aron maoy iyang isunod pagmasahe.
Mura’g gigilokan si Kenn diha nga gihapuhap na ni Ramon ang iyang paa. Apan wala magtingog ang dalaga. Nakabantay si Ramon nga ingon sa namarog ang balhibo ni Kenn. May pagka balbon si Kenn mao nga klaro kaayo nga namarog ang iyang balhibo.
Wala tuyoa ni Ramon nga mosakdap sa iyang hunahuna ang kaibog sa iyang nakita. Anam-anam siya nga gihakop sa kalalim. Mipiyong si Ramon ug nangaliya nga dili siya dag-on sa tentasyon.
“Ngano nga wala ka man magtingog Mon? Mura ka na man og naamang,” gibuak ni Kenn ang kahilom. “Kuan Kenn, mi-concentrate lang ko aron maayo g’yud nako pagmasahe. Akong gipiyong ang akong mga mata,” matud ni Ramon.
“Mao ba? Dili ka makakita sa imong gimasahean?” mura’g kataw-onon si Kenn nga nangomedya. Unya, giingnan ni Ramon si Kenn nga mohayang aron ang atubangan na usab nga bahin sa paa ug bitiis ang iyang masahean. (Sumpayan)