Dad-a ko sa imong paglupad

Nasakit og polyo si Miraluna ug dili na siya makabarug. Tungod niini anha na lang siya kanunay maglingkod sa wheel chair nga pinalit sa iyang papa Oscar.

Suwerte si Miraluna kay gawas nga bugtong siyang anak, sapian usab ang iyang mga ginikanan nga si Generoso ug Conchita. Si Generoso anak og usa ka politiko nga adunay dako’ng negosyo samtang si mama niya Conchita anak og usa ka kongresista. Ning iyang kahimtang, may anak sa ilang saop nga naibog kang Miraluna.

Sa higayon nga anha si Miraluna sa ilang tanaman magkalingaw og tutan-aw sa mga bulak sa harden, kalit lang motumaw si Roberto ug mokutlo kini’g usa ka bulak ug ihatag niya kang Miraluna.

“Timaan kini sa akong gugma kanimo, senyorita Mira,” ni Roberto pa ngadto sa anak sa tag-iya sa yuta nga ilang gitikad. “Ubos ra ko alang kanimo, senyorita, apan ang akong gugma hilabihan ka taas nga kun mahimo gani, mosangko kini sa langit,” matud ni Roberto.

“Salamat, ha, Roberto, niining rose nga imong gihatag nako,” ni Miraluna nga nagpahiyom. Aduna’y dapit si Roberto sa iyang kasingkasing ugaling lang kay anak kini sa ilang saop ug dili g’yud mahitabo nga dawaton si Roberto sa iyang mama ug papa isip iyang hinigugma.

Busa wala g’yud niya sugta si Roberto, apan iyang gipakita sa ulitawo nga may hilom siya nga paghigugma sa ulitawo.

Usa ka gabii, may tingog sa wakwak nga nabati si Miraluna... “Wakkkk! Wakkk!” Mibangon si Miraluna ug giablehan ang bentana. Iyang nakita si Roberto nga nagtuk-ong sa usa ka dako’ng sanga sa akasya sa at’bang nga hintandangan sa kahayag sa bag-ong misubang nga buwan.

Ungo si Roberto! Usa siya ka mangtas! ni Miraluna pa sa hilom, apan wala siya mahadlok. Hinuon, milumpat ang iyang diwa nga nakita si Roberto.

“Miraluna, dali, dad-on ko ikaw sa akong paglupad,” ni Roberto nga naglutaw sa hangin ug iyang gikab-ot ang duha ka bukton ni Miraluna. Si Miraluna wala makatingog sa iyang nasaksihan apan sa hinay ug hagawhaw nga mga pulong siya miingon,“Roberto, mahal ko ikaw, dad-o ako sa imong paglupad...”

Ug milupad si Roberto nga nagsapnay kang Miraluna ug malipayon kaayo si Miraluna nga nia sa iyang kiliran ang gihigugma niya nga si Roberto, ang mangtas nga ungo nga anak sa ilang saop. (Kataposan)