Gianugnan si SPO1 Nicko Bernal nga gipatay ang maestra nga si Mrs. Tommi kay makatug-an unta kini kun kinsa ang lider sa kulto.
“Dili diay siya ang pangulo sa kulto, sir, nasayop lang diay kita sa atong pangagpas,” matud ni PO3 Cañares.
Gumikan sa maong hitabo, naglibog na pag-ayo sila si Nicko. Mibalik sa zero ang ilang imbestigasyon kalabot sa pagpamatay sa kabataan sa lungsod sa Tinago.
Wala na sila’y laing matumbok nga sarang kadudahan nga mao ang pangulo sa Bangkulis Black Brotherhood.
Usa ka higayon niana, gipatawag si Nicko ni Chief Inspector Dindo Raval. Mao pa gani ang iyang paglingkod sa silya kilid sa talad sa hepe, may gitunol kaniya nga papel ang hepe.
“Unsa man kini, sir?” pangutana ni Nicko, dayong dawat sa papel.
“Order kana gikan sa atong provincial director. Gitagalan na lang kita niya’g bayente ka adlaw pagsulbad niining krimen nga midagsang karon sa lungsod sa Tinago. Nasuko na pag-ayo si Supt. Sancho Ebero niining maong hitabo,” matud sa hepe.
Gibasa ni Nicko ang order. Tuod, gidetalye niini nga kinahanglan masulbad nila ang kaso sa pagpatay sa mga bata sa lungsod sa Tinago sulod lang sa 20 ka adlaw. (Sumpayan)