May barko kuno nga matag karon ug unya moagi sa suba sa Magtubod ug matud pa ang maong barko motungas kini paingon didto sa balangay sa Itik.
Ang nakakita niini mao si Pilong, ang palahubog nga kanunay lang mabuntagan sa inom, diha nga misubay siya sa may tampi aron unta motuman sa sugo sa lawas.
Si Pilong misugilon kang Kapitan Iko nga iya g’yud kuno nga nakita ang barko ug nindot kuno kaayo.
“Dili kaha sa kahubog lang na nimo, Pilong? Barko gud tawon. Dili kaagi ang barko diha, uy...” matud ni Kapitan Iko.
“Barko lagi, Kapitan,” ni Pilong nga nagkayungit. Aw, mao man kaha, na hala, padayon sa imong pagka palahubog,” ni Kapitan Iko nga wala motuo ni Pilong.
“Basta kay nakakita ko’g barko...” ni Pilong nga militok apan nagkanguhal.
Tuod, usa ka kaadlawon, diha nga miadto si Kapitan Iko sa tampi sa suba, iyang nakita ang dako’ng barko nga mitadlas paingon sa balangay sa Itik.
Ug nakita pa g’yud sa kapitan ang mga sakay niini. Pulos mga ambongan ug mga maanyag. “Dios ko, tinuod diay ang gisulti ni Pilong...”
Pagka sunod adlaw, may usa ka ambongan nga tawo nga miadto sa balangay sa Magtubod ug nangita kang Kapitan Iko. Ug diha nga nagkasultihanay na sila.
“Mao na, Kapitan, gusto namo nga butangan og pantalan kining dapita dinhi sa inyong sityo sa Magtubod. Segurado g’yud nga moasenso kining inyong lugar.
Kuan diay, ako si Christomo, ang anak ni Donya Pilomena ang ig-agaw kanhi ni Maria Cacao, ang labing dato nga engkanto nga usa ka negosyante...”
Ug diha nga nanamilit si Christomo, mura’g nanlimbawot ang balhibo ni Kapitan Iko. Tuod, duna nay pantalan ang balangay sa Magtubod ug sila lang si Kapitan Iko ug Pilong ang makakita, kay ang uban nga mga lumolupyo dinhi sa Magtubod dili man g’yud motuo sa gitaho nila ni Kapitan Iko ug Pilong.
Apan usa ka kaadlawon, nakadungog sila’g budyong sa barko -- sipa ug lanog nga budyong ug ang mga lumolupyo misugod na sa pagtuo nga ang ilang balangay gitukoran na’g pantalan sa mga engkanto.
Unya usa ka gabii, may ambongang ulitawo nga namisita sa anak dalaga ni Kapitan Iko ug si Pilong gipatrabaho sa barko ni Donya Pilomena, ang dato nga engkanto. – Kataposan