Gula 78
“Kinsa man kaha kadtong mga tawhana, Sir, ug unsa man kahay ilang gibuhat ni Mrs. Tommi?,” matud ni PO3 Roy Cañares.
Nahukman nila ni SPO1 Nicko Bernal nga sudlon ang balay sa maestra. Nagpabilin sila si Rudy ug Reuben aron maoy magbantay sa gawas.
Midiretso sila si Nicko sa lawak diin naggikan ang buto-buto kaganina. Ug misiga ang ilang mga mata sa ilang nakita.
Mibantang sa panan-aw nila ni Nicko ug Roy sila si Mrs. Tommi ug ang anak niini nga naghayang sa salog ug naglunang sa dugo. May samad-pinusilan ang ilang kalawasan.
Wala na maglihok ang bata. Apan nagginhawa pa si Mrs. Tommi. Gidali kini pagduol ni Nicko ug gisapupo ang ulo.
“Kinsay naghimo niini kaninyo, Mrs. Tommi?” pangutana ni Nicko.
“S-sir...” nagputolputol ang sinultihan ni Mrs. Tommi tungod sa daghang dugo nga migawas sa iyang baba. “Na-nakaila na a-ako s-sa pa-pangulo s-sa ku-kulto.”
“K-kinsa?” ni Nicko pa. “Kinsa siya, Misis? Kinsa?”
“S-si...” ni Mrs. Tommi nga nagkabugto na ang gininhawa. “S-si...”
Ug mituay ang ulo ni Mrs. Tommi nga gisapnay ni Nicko. Bisan giunsa kinig yugyog ni Nicko apan wala na gayod maglihok ang lawas sa magtutudlo.
“Anugon,” nakatuaw si Nicko. “Wa g’yud siya makatug-an sa buot niya nga isulti.” (Sumpayan)