Ngil-ad nga estorya

Diha pa lang sa ikaduhang tuig sa kurso nga abogasiya si Nardo, nakadungog na siya’g ngil-ad nga estorya batok kaniya.

Ang iyang uyoan nga si Andoy, maguwang sa iyang Mama Gerarda, mipalakaw og tabi ngadto sa ilang mga silingan ug kaparyentehan.

Dunay ig-agaw ni Nardo nga gibati og kaluoy niya. “Matay’ng buanga, gaw! Gipalutaw man ni Tiyo Andoy nga dautan ka nga pagkatawo. Inigka abogado kuno unya nimo, ilugon nimo ang kayutaan sa atong katiguwangan,” sumbong ni Eddie diha nga nibisita siya sa bupete nga gialagaran ni Nardo isip clerk/messenger.

Nag-self supporting student si Nardo kay paghuman niya’g kurso nga Accountancy, di na man siya gastohan sa iyang ginikanan og laing kurso.

Buotan si Nardo. Nieskuyla lang siya’g abogasiya kay nagalgal sa iyang amo nga abogado. Wa siya’y dautang tinguha sa iyang isig ka tawo, labi na sa mga paryente.

Dili gani siya dawo. Kada bisita ni Tiyo Andoy niya sa iyang trabahoan, hatagan kini og kuwarta ni Nardo. Panahon sa Pasko ug birthday sa iyang uyoan, hatagan niya’g regalo.

Naguol si Nardo. Gisakitan siya nga naghunahuna nga luyo sa iyang kaayo ngadto sa iyang uyoan, gitan-aw diay siya nga dautan. Usa ka hapon, nibisita ni Nardo ang iyang uyoan. Wa g’yud kini kalibutan nga ang iyang gipakatap nga tabi, niabot na sa dunggan sa hingtungdan.

Niamin si Nardo sa iyang uyoan. Sama sa wa’y nahitabo. “Unsay ato, Tiyo?,” ni Nardo, sa laghaw nga tingog.

“Mangayo unta ko nimo’g inadlawan. Birthday nako ugma,” ni Tiyo Andoy niya. “Buanga tiyo, no. Mura ma’g kagahapon lang to ang imong birthday. Tuig na sab diay,” ni Nardo. Makantalitahon.

“Aron di ka na magsige og pangayo nako, tingbon na nako og hatag ang para nimo. Sukad karon, ayaw na g’yud og pangayo nako bisa’g unsa. Kay wa na ko’y ikahatag,” ni Nardo.

“Ngano man diay Dong Nards?” sa iyang uyoan. Patosotoso. “Mao ni akong labing dako nga inadlawan nimo,” ni Nardo nga nitunol og papel sa uyoan. May pirma ni Nardo ang papel.

“Unsa man ni?” sa uyoan. “Basaha lang” ni Nardo. “AKO, LEONARDO P. AMORO, naghatag ngadto ni SERVANDO PAJUGOT, sa tanang yuta nga mapanunod nako sa akong mga ginikanan ug apohan.”

Nabasa sa uyoan. Nanglipaghong. Nangluspad. Gipaningot. “Segurado nga tagbaw na g’yud ka tiyo. Kay kun duna ko’y mailog nga yuta, akong ihatag nimo,” ni Nardo. Nigawas sa opisina iyang uyoan nga way tingogtingog ug gikumot ang papel. (Kataposan)