Gula 76
Gitug-anan ni SPO1 Nicko Bernal ang ilang hepe nga gipanid-an nila ang maestra nga si Mrs. Tommi sa pagduda nga mao kini ang lider sa kulto.
“Makapaduda ang paglakaw sa maestra niadtong orasa sa kagabhion sir, ilabi na karon nga may laing bata na usab nga gipatay ug gilabay sa sapa,” giingnan ni Nicko si Chief Inspector Dindo Raval.
“Apan dili nato mahimong taralon sa hukmanan si Mrs. Tommi kay wala kamo’y nahuptan nga ebidensiya batok kaniya. Maayo unta og naaktohan ninyo siya nga nakig-uban sa mga sakop sa kulto, ilabi na atol sa pagpatay sa lain na usab nga bata nga biktima,” matud sa hepe.
“Sagdi lang, sir, kay paladman ko pa g’yud ang akong imbestigasyon mahitungod niining kasoha,” ni Nicko. “Buhata kana, Nicko kay misalig ako sa imong katakos,” sumala pa sa hepe.
Paggawas ni Nicko gikan sa opisina sa hepe, gisugat siya ni PO3 Roy Canares. “Tawga sila si Rudy ug Reuben kay may sabotan kita,” giingnan ni Nicko si Roy.
Miabot ang tulo ka polis ug milingkod sila atubangan ni Nicko. May nahuna-hunaang paagi si Nicko kun unsaon nila nga masulbad ang sagunson nga pagpatay sa upat na ka bata nga babaye nga pareho’ng natawo sa Septiyembre 8. (Sumpayan)