Ang ungo ug ang killer

May tawo nga nagsul-ob og itom nga jacket ug may gikalib-ay nga bag. Taason ug may bigote. Lihokan ang iyang tinan-awan nga mura’g kanunay’ng naniid o kaha may gipangita.

Ang tawo nangita’g kuwarto nga kaabangan ug dali kaayo si Inse Basyang nga nakatanyag sa bakante niya nga kuwarto. Naamigo sa tawo si Kosme nga manananggot sa Sityo Gabok-Tulay.

Matag hapon, adtuon sa tawo si Kosme ug mopalit kini sa bag-ong dawat nga tuba. Mitug-an ang tawo kang Kosme kun kinsa siya.

“Ako si Bartoy, taga isla Lubog-Buwan, sayo ko nga nailo sa ginikanan kay gibalbal sila sa mangtas nga ungo. Ania ko dinhi sa Sityo Gabok-Tulay kay nadungog kining dapita nga adunay daghang ungo,” matud ni Bartoy.

Mitug-an si Bartoy nga kanhi siya polis ug mi-resign lang sa serbisyo kay gusto niya nga patyon ang tanang ungo agi’g panimawos sa pagbalbal nila sa iyang tatay ug nanay.

“Daghan na ko’g napatay, Kosme, busa, sultihi ko kun kinsa’y gidudahan nga ungo dinhi,” ni Bartoy nga mipakita sa iyang kalibre 45 nga pistola ug bronse nga punyal.

“Killer ka diay,” ni Kosme pa samtang nagbaid sa iyang sanggot nga ig-alabis sa sanggotan.

Miyango si Bartoy. Unya kalit sila nga nahalingi kay nakadungog sila’g kinanaas sa mga langkay. Usa ka matahom nga dalaga ang nagsingabot nga nagbitbit og hungot.

“O, Mona, mopalit ka’g tuba?” ni Kosme pa.

“Oo, Kosme, naay bahal? Kay ampay ni tatay ang bahal,” ni Mona pa.

“Kaguwapa niya, Kosme,” ni Bartoy pa sa hinay nga tingog.

“Siya ang anak ni Noy Lucas, ang gidudahan nga ungo dinhi sa among sityo, Bartoy,” hagawhaw ni Kosme.

“Wala motingog si Bartoy nga nagtutok sa dalaga. Pagka-gabii samtang nag-inom og kape si Bartoy may misangpit kaniya. Si Lucas diay.

“Ikaw diay si Bartoy, karon pangandam, kay magtakus na ta,” ni Lucas nga may gibitbit nga latigo. “Ikaw diay ang tigpatay sa mga ungo. Karon, nia na man ko, ug sayod ko nga ubay-ubay na ang imong napatay, apil na ang akong mga paryente, busa andama ang imong kaugalingon!”

Napatay ni Bartoy si Lucas pinaagi sa bala apan kalit usab siya nga gipaak ni Mona sa liog ug nalup-og.

Imong gipatay ang akong amahan,” ni Mona nga misuyop sa dugo ni Bartoy. (Kataposan)