Tilaw sa katam-is

Gula 10

Pagkaugma, gibisitahan ni Arthur si Shane didto sa gitrabahoan niini nga department store. Nakalitan ang dalaga sa kalit pagtunga niini sa iyang trabahoan.

“Unsay ikaalagad nako sa banggiitang singer?” matud ni Shane nga nangomedya pa kang Art. “Ikaw maoy ngilngig kaayong mokanta Shane, labi na ang awit ni Claire dela Fuente nga Sayang. Puwede ba huwaton tika inig off nimo?” matud ni Art.

Misugot si Shane nga magpaabot kaniya si Arthur. Nasabot ni Art nga wala g’yud diay boyfriend si Shane nga mokuha kaniya human sa iyang trabaho. Tuod, pagka gabii na, mibalik si Arthur sa gawasanan sa mga kawani sa department store.

Nakit-an dayon siya ni Shane samtang nagtindog duol sa usa ka traffic sign. “Asa man ta karon? Ihatud ko nimo’g pauli?” gisukna ni Shane ang ulitawo. Miyango si Art.

“Sa dili ko pa ikaw ihatod, mangaon usa ta kay aduna ko’y pakigsultihan kanimo. Na-entriga g’yud ko sa imong gikanta gabii nga Sayang,” matud ni Arthur.

Nakita ni Art nga mipahiyom si Shane nga nakadungog sa iyang gisulti. Misulod sila og fast food restaurant diha sa dalan Colon. Didto sila molingkod sa lamesa nga wala’y naglingkod sa duol.

Mi-order sila og pagkaon. “Nakatulog ka ba dayon sa imong pag-abot gabii?” matud ni Shane nga maoy una nga mibuak sa ilang kahilom. “Wala,” pintok nga tubag ni Art dungan sa paglingo-lingo.

“Ngano man?” ni Shane. “Naghuna-huna ko kun ngano nga mikanta ka og Sayang,” sa ulitawo pa. (Sumpayan)